דראמע אין אונגארן: אנגעטרונקענער מאן גנב'עט א פליגער און פליט דירעקט צום לאנד'ס איינציגסטע נוקלעארע פלענט

אן אומגעווענליכע און שרעקעדיגע אינצידענט האט זיך אפגעשפילט אין דרום אונגארן פרי שבת אינדערפרי, ווען א 24-יעריגער מאן, וועלכער איז לויט באריכטן געווען אונטער די איינפלוס פון אלקאהאל, האט געגנב'עט א קליינע פליגער און געפלויגן דערמיט גלייך צום לאנד'ס איינציגסטע נוקלעארע פאוער פלענט.

לויט די אונגארישע אויטאריטעטן, האט דער יונגערמאן ארויסגענומען א 'סעסנע 172' פליגער אן קיין ערלויבעניש פון אן עירפארט אין קאלאטשא (Kalocsa) און זיך ארויסגעלאזט אין די ריכטונג פונעם 'פאקס' נוקלעארע פלענט, וואס געפינט זיך ביים דוניי טייך און שטעלט צו בערך האלב פון די עלעקטריציטעט פאר'ן גאנצן לאנד. וויבאלד די פלענט האט א ספעציעלע שוץ סטאטוס, איז שטרענג פארבאטן פאר ציווילע פליגערס אריינצופליען אין א ראדיוס פון דריי קילאמעטער ארום די געביידע. דער אומלעגאלער פליגער האט באלד פארלעצט די געזעצן, און די אונגארישע מיליטערישע ראדארן האבן אים אויפגעכאפט כמעט גלייך נאכ'ן זיך הייבן, וואס האט אלארמירט די נאציאנאלע לופט פארטיידיגונג סיסטעמען.

מיליטערישע רעאקציע און א קראך לאנדונג

אין בלויז עטליכע מינוט האט דאס אונגארישע מיליטער ארויסגעשיקט צוויי 'גריפען' פייטער דזשעטס אפצוכאפן דעם פליגער בעת ער האט געמאכט ווילדע מאנעוורעס אינעם פארבאטענעם לופט-רוים ארום די נוקלעארע פאסיליטי. דער פארטיידיגונגס מיניסטער האט באשטעטיגט די פאסירונגען, אנווייזנדיג וויאזוי די דזשעטס האבן נאכגעפאלגט דעם קליינעם פליגער און אים געהאלטן אונטער א שטרענגע וואך.

די עפיזאד האט זיך געענדיגט פלוצלינג ווען דער געגנב'עטער סעסנע האט געמאכט א ווילדע עמערדזשענסי לאנדונג אין א פעלד פון זונרויזן נעבן דעם דארף גערדזשען. די רעדער פונעם פליגער זענען אפגעבראכן געווארן און דער פליגער איז געבליבן שטעקן אויף איין זייט. ווידעא קליפס פונעם קראך האבן אויפגעכאפט די דראמאטישע סצענע, כאטש די באאמטע האבן באשטעטיגט אז קיינער איז נישט פארוואונדעט געווארן און די נוקלעארע פלענט האט נישט געליטן קיין שום שאדן.

פרובירט צו גנב'ענען א קאר ביים אנטלויפן

אנשטאט צו בלייבן ביים קראך ארט, האט דער פילאט איבערגעלאזט דעם צובראכענעם פליגער און פרובירט צו אנטלויפן צופוס. ער האט אויסגעזען צעמישט בשעת ער האט געוואנדערט אויף א דערנעבנדיגע גאס. ווען א דורכפארער האט זיך אפגעשטעלט אים צו אפפערן הילף, האט דער מאן פרובירט צו גנב'ענען זיין קאר אויך! דאס האט עווענטועל געפירט צו זיין ארעסט דורך די לאקאלע פאליציי.

די פאליציי האט אידענטיפיצירט דעם פארדעכטיגטן אלס א 24-יעריגער איינוואוינער פון סאמאר (Szomor), און זיי זאגן אז ער איז ווארשיינליך געווען אונטער די איינפלוס פון אלקאהאל, און מען פארשט אויס צו ער האט אויך גענומען אנדערע אומלעגאלע סובסטאנצן. ער שטייט יעצט אויס קלאגעס פאר קאר גניבה, פליגער גניבה, און אריינלייגן מענטשן אין א סכנה, און די אויטאריטעטן האלטן אים אין ארעסט.

אויספארשונג איבער עירפארט סעקיוריטי

די פייטער דזשעטס זענען געבליבן פליען העכער דעם קראך ארט ביז רעטונגס העליקאפטערס און עמערדזשענסי קרוס זענען אנגעקומען, וואס צייגט ווי ערנסט די אונגארישע באאמטע האבן גענומען דעם אינצידענט, אפילו עס האט זיך אויסגעלאזט אן קיין פאטאליטעטן.

נאכ'ן אינצידענט האבן די אוויאציע אויטאריטעטן באלד אנגעהויבן אן אויספארשונג אינעם קאלאטשא עירפארט צו זען וויאזוי דער יונגערמאן האט בכלל באוויזן צו צוקומען צום פליגער און עס ארויסגנב'ענען, און מען פלאנט צו פארשטארקן די סעקיוריטי ביי עירפארטס איבער'ן גאנצן לאנד. דער אונגארישער פארטיידיגונגס מיניסטער האט געלויבט די שנעלע רעאקציע פונעם מיליטער אלס א באווייז אז דאס לאנד איז גרייט זיך צו ספראווען מיט סיי וועלכע לופט-סטראשע. דאך האט די פאסירונג אויפגעברענגט פרישע פראגעס איבער די סעקיוריטי פראצעדורן און ווי גרינג עס איז פאר אן אומאויטאריזירטער פערזאן צו קענען אפערירן א פליגער.