בס"ד

היסטארישע מעלדונג: פרעזידענט טראמפ פראקלאמירט ריזיגע 6.6 ביליאן דאלאר פראדזשעקט צו בויען די גרעסטע שיפבויעריי אין אמעריקע זינט די צווייטע וועלט קריג

פרעזידענט טראמפ איז ארויסגעטראטן מיט א מעכטיגע מעלדונג שטייענדיג אויפן היסטארישן ארט אין מערילענד וואו די באקאנטע 'בעטהלעהעם סטיעל' פירמע פלעגט אמאל פראדוצירן שיפן און דעם שטאל פאר די בארימטע 'גאלדען געיט בריק'. דער פרעזידענט האט געמאלדן איבער די בוי-ארבעט פון א נייע מאסיווע שיפבויעריי, וואס ער האט אנגערופן אלס די גרעסטע פון איר סארט וואס ווערט געבויט אין די פאראייניגטע שטאטן זינט די צווייטע וועלט קריג.

דער ריזיגער פראדזשעקט, וואס האט באקומען דעם נאמען "ארסענאל-2" (Arsenal-2), וועט אויפגעבויט ווערן אויפן געוועזענעם 'ספעראוס פוינט' שטח אין מערילענד. עס וועט זיך אויסשפרייטן אויף א מאסיווע שטח פון איבער צוויי מיליאן סקווער פיס, איבער א שטח פון 187 עיקערס.

די דעפענס טעכנאלאגיע פירמע 'ענדוריל אינדוסטריס' (Anduril Industries) אינוועסטירט 3.7 ביליאן דאלאר פון אירע אייגענע קאסעס פאר דעם פראדזשעקט, בשעת די אמעריקאנער נעיווי לייגט צו א קאנטראקט אין ווערד פון ביז 2.9 ביליאן דאלאר, וואס ברענגט די סך הכל אינוועסטמענט צו א געשאצטע 6.6 ביליאן דאלאר. די נייע פאבריק וועט פראדוצירן וויכטיגע טיילן פאר די נעיווי'ס 'ווירדזשיניע-קלאס' סובמארינען, אריינגערעכנט טארפידא רערן און אנדערע אונטערוואסער טעכנאלאגיע. די ערשטע פראדוקציע פונעם פלאנט ווערט ערווארטעט זיך צו אנהייבן ארום יאר 2030.

פרעזידענט טראמפ און די פירער פון די 'ענדוריל' פירמע האבן ארויסגעברענגט אז די מעלדונג איז א ריזיגע געווינס סיי פאר די מיליטער און סיי פאר די עקאנאמיע. די נייע שיפבויעריי ווערט ערווארטעט צו שאפן ארום 3,100 דירעקטע דזשאבס, און וועט שטיצן נאך איבער 11,000 אנדערע פאזיציעס, וואס וועט אריינברענגען א געשאצטע 2 ביליאן דאלאר א יאר פאר די מערילענד עקאנאמיע. דער פרעזידענט האט אויך ערווענט די מעגליכקייט אז די גאווערנמענט וועט עווענטועל אפקויפן ביז 21 ביליאן דאלאר אין ווערד פון פראדוקטן פונעם פלאנט איינמאל עס ארבעט אין פולן שוואונג.

די פירערשאפט פון 'ענדוריל' האט פארבינדן דעם נייעם פראדזשעקט צו די היסטארישע ראלע פונעם ארט, אנווייזנדיג אז דער 'ספעראוס פוינט' שטח האט אמאל געהאלפן בויען די פלאטע וואס האט געוואונען די צווייטע וועלט קריג, און יעצט ווערט עס ווידער גערופן צו העלפן מאדערניזירן די אמעריקאנער סובמארין פלאטע. באאמטע זאגן אז דער שריט איז דירעקט געצילט צו לעזן די לאנג-פארצויגענע פארהאלטונגען אין די אמעריקאנער סובמארין פראדוקציע, און צוריק אויפלעבן די שיפבויעריי אינדוסטריע וואס איז שטארק איינגעשרומפן געווארן אין די לעצטע צענדליגע יארן.