א רואיגע מאנטאג נאכמיטאג אינדרויסן פונעם 'דזשענינגס קאונטי קאורטהאוז' אין אינדיאנא האט זיך פארוואנדלט אין א כאאטישע סצענע, ווען א 68-יעריגע פרוי אונטערן איינפלוס פון אלקאהאל האט גענומען איר זילבערנע קאר פאר א ווילדע רייזע איבער די גראז פונעם געריכט הויז.

אין א סעקיוריטי ווידעא וואס איז ארויסגעגעבן געווארן דורך די דזשענינגס קאונטי שעריף אפיס, קען מען זען ווי די קאר פארט ווילדערהייט פאראויס און צוריק, אויפווארפנדיג א פולע וואלקן פון שטויב און גראז, בשעת זי פארמיידט קוים אריינצוקראכן אין די ביימער, א סיין, און א קאנקריט באנק.

פאליציי אפיצירן האבן ארעסטירט די פרוי אויפן ארט, און איר אנגעקלאגט פארן דרייוון אונטערן איינפלוס פון אלקאהאל, צוזאמען מיט נאך עטליכע אנדערע קלאגעס. ברוך השם עס זענען נישט געווען קיין פארוואונדעטע, אבער די ווילדע שטיקל האט איבערגעלאזט דעם קאורטהאוז גראז אינגאנצן חרוב און צעריסן.

די שעריף'ס אפיס האט רעאגירט צו דעם קאמישן אינצידענט מיט א סארקאסטישע מעלדונג אויף פעיסבוק, שרייבנדיג: "אויב האט איר געטרינקען אביסל צו סאך אלקאהאל ביי נאכטמאל, ביטע זעצט אייך נישט אונטערן רעדל, און מאכט זיכער נישט קיין 'דאונאטס' אויפן קאורטהאוז גראז."

די פאוסט איז שנעל געווארן וויירעל, און די ווידעא איז ארומגעפארן איבעראל בשעת מענטשן האבן זיך געוואונדערט ווי נאנט די קאר איז געווען צו מאכן אן ערנסטן עקסידענט. אונטער די הומאר, האבן די אפיצירן אויסגענוצט די געלעגנהייט איבערצוגעבן אן ערנסטע מעסידזש פאר די איינוואוינער, אז מען זאל אלץ האבן א צוגעגרייטע דרייווער אדער א זיכערע וועג אהיים נאכן טרינקען, אנשטאט צו ריזיקירן מיט אזא סצענע, אדער חלילה נאך ערגער, אויפן גאס.