יאפאן: באן קאמפאני נעמט אויף ריזיגע ראבאטן מיט 'טשעין-סאו'ס' צו העלפן מיט געפארפולע ארבעט

די ארבעטער ביי די יאפאנעזער באן סיסטעם גייען באקומען צוויי נייע ריזיגע מעכאנישע מיטארבעטער, און איינע פון זיי קומט באוואפנט מיט א 'טשעין-סאו' (זעג). די "וועסט יאפאן רעילוועי קאמפאני", באקאנט אלס 'JR West', לייגט צו צוויי נייע מעינטענענס ראבאטן צו זייער פלאטע, א שריט וואס צילט צו פארמינערן די געפארן פאר די ארבעטער און זיך ספראווען מיט די מאנגל אין שטאב.

דער הויפט ראבאט איז דער 'ZX-3', א האלב-מענטשליכע מאשין מיט צוויי ארעמס. איין ארעם האט א גרויסע כאפער (גריפער) און די צווייטע האט א זעג. דער ראבאט ווערט ארויפגעשטעלט אויף א טראק און קען דערגרייכן ביז 49 פיס הויך אין די לופטן. ער קען אנכאפן א צווייג פון א בוים מיט איין האנט, און עס אפשניידן מיט די צווייטע. אן אפערעיטאר זיצט פארזיכערט אויף דער ערד און קאנטראלירט די מאשין דורך קוקן אויף א לייוו ווידעאו פון קעמערעס וואס זענען אינסטאלירט אויפן ראבאט'ס קאפ. דער ZX-3 איז קלענער און גרינגער פונעם פריערדיגן מאדעל (ZX-1) וואס די קאמפאני נוצט שוין זינט יולי 2024, אבער ער קען דערגרייכן העכער, און ער גייט אנהייבן ארבעטן אין נאוועמבער.

זיין שותף איז דער 'ZX-2', א ראבאט מיט איין ארעם וואס גייט שוין אנהייבן ארבעטן דעם חודש. ער קען אויפהייבן שווערע וואג ביז 265 פונט, וואס גייט זיין א געוואלדיגע הילף פאר די טיעמס ווען זיי דארפן טוישן שווערע טיילן פון די עלעקטריק ווייערס העכער די באן שינעס.

ביידע מאשינען באלאנגען צו די 'ZIZAI' סעריע פון באן ראבאטן, וואס איז אנטוויקלט געווארן דורך 'JR West' אינאיינעם מיט די פירמעס 'ניפאן סיגנאל', די ראבאטיק פירמע 'דזשינקי-איטיי' און די באן-פראדוצירער 'טאיא שאריא'. די סיבה פארוואס זיי ברענגען אריין די ראבאטן איז א פשוט'ע: יאפאן ליידט פון אן ערנסטע מאנגל אין ארבעטער. דערצו איז קריכן אויף הויכע שטאנגען אדער ארבעטן נעבן לעבעדיגע עלעקטריק ווייערס זייער א געפארפולע ארבעט. דורכן האלטן די מענטשן אויף דער ערד, שניידט מען אראפ די ריזיקע פון פאלן אדער כאפן אן עלעקטריק שאק.

די קאמפאני צילט צו רעדוצירן די צאל ארבעטער וואס פעלט זיך אויס פאר די סארט מעינטענענס ארבעט מיט בערך 30 פראצענט, דאס זעלבע ציל וואס זיי האבן זיך געשטעלט ווען זיי האבן ארויסגעברענגט זייער ערשטע ראבאט אין 2024. עס בלייבט איבער צו זען ווי גוט די נייע מאשינען וועלן זיך פירן אויפן פעלד, און צי די ראבאטן וועלן טאקע באפרייען די ארבעטער פאר אנדערע וויכטיגע פראדזשעקטס אדער פשוט קלענער מאכן די טיעמס.