קריגס סעקרעטאר פיט העגסעט מיט א שארפע ווארענונג צו איראן: "די צעדרייטע איסלאמיסטן וועלן קיינמאל נישט האבן קיין נוקלעארע וואפן"

וואשינגטאן. – דער אמעריקאנער קריגס סעקרעטאר, פיט העגסעט, האט ארויסגעשטעלט א שארפע און קלארע ווארענונג צו איראן ביי א פרעסע קאנפערענץ אינעם פענטאגאן, דערקלערנדיג אז די איראנער רעזשים וועט קיינמאל נישט באקומען די מעגליכקייט צו פראדוצירן א נוקלעארע וואפן.

"די צעדרייטע איסלאמיסטן אין טעהראן וועלן קיינמאל, קיינמאל נישט האבן קיין נוקלעארע וואפן," האט העגסעט געמאלדן, פאַרטיידיגנדיג דעם באשלוס פון פרעזידענט דאנאלד טראמפ צו באשטעטיגן די פרישע מיליטערישע אפעראציעס קעגן איראנער צילן.

העגסעט האט אנגעוויזן אויף די סוקסעסן פון אפעראציע "מידנייט העמער", אין וועלכע אמעריקאנער B-2 באמבאדיר פליגערס האבן אטאקירט די הויפט נוקלעארע איינריכטונגען אין פארדאו, נאטאנז און איספאהאן, און אנגעמאכט מאסיווע שאדנס פאר די איראנער נוקלעארע אינפראסטרוקטור. ער האט אויך ארויסגעברענגט די רעזולטאטן פון אפעראציע "עפיק פיורי", זאגנדיג אז די אמעריקאנער קרעפטן האבן באמבאדירט מער ווי 13,000 צילן אין א קורצע צייט-אפשניט פון ווייניגער ווי 40 טעג פון כסדר'דיגע קאמפן.

לויט זיין אפשאצונג, איז די איראנער נעיווי אינגאנצן איינגעזינקען געווארן, זייער עיר-פארס איז פאראליזירט און געגראונדעט, און מער ווי 80 פראצענט פון זייער נוקלעארע אינדוסטריעלע באזע איז געווארן פארניכטעט. ער האט באצייכנט די אפעראציעס אלס א ריזיגע מיליטערישע דערגרייכונג וואס האט דראסטיש אפגעשוואכט טעהראן'ס מעגליכקייטן צו פאראויסרוקן אירע סטראטעגישע צילן.

דער סעקרעטאר האט ווייטער געמאלדן אז אמעריקע האלט אן א שטרענגע נעיוואל בלאקאדע קעגן איראן, און האט קלארגעשטעלט אז די אמעריקאנער מיליטער קאנטראלירט אינגאנצן דעם 'הארמוז דורכגאס', וואס איז א קריטישע רוטע פאר אינטערנאציאנאלע ענערגיע טראנספארטאציע. ער האט אראפגעלייגט די מיליטערישע קאמפיין אלס א טייל פון די ברייטערע ציל פון די אדמיניסטראציע צו אפהאלטן איראן פון אנטוויקלען נוקלעארע וואפנס און סטראשען אמעריקאנער אינטערעסן און די זיכערהייט אינעם מיטל-מזרח ראיאן.

העגסעט האט איבערגעחזר'ט זיין פולע שטיצע פאר די אטאקעס, זאגנדיג אז ער וואלט עס איבערגעטאן נאכאמאל, און האט געווארנט אז די אמעריקאנער קרעפטן זענען גרייט צו רעאגירן מיט קראפט אויב טעהראן וועט פרובירן צו נעמען ווייטערדיגע שריט.

עס איז אבער וויכטיג אנצומערקן אז די ציפערן איבער די פארנעם פון די חורבנות זענען בלויז פרעזענטירט געווארן דורך העגסעט און זענען דערווייל נאכנישט אומאפהענגיג באשטעטיגט געווארן. די קלעימס פון די אדמיניסטראציע קומען אין א צייט וואס דער קאנפליקט איז נאך ווייט פון פאראיבער, און דיפלאמאטישע געשפרעכן גייען אן אינאיינעם מיט די עקאנאמישע און מיליטערישע דרוק.

דער מעסעדזש פון העגסעט איז אבער געווען קליפ און קלאר: וואשינגטאן פלאנירט אנצוהאלטן דעם מאקסימום דרוק אויף טעהראן, און דאס אפהאלטן איראן פון באקומען א נוקלעארע וואפן בלייבט דער הויפט ציל פון די אמעריקאנער אויסערן פאליסי.