אן אויספארשונג דורך די 'סי-ען-ען' נייעס אגענטור האט אנטפלעקט אז 14 רוסישע שפיאנאזש סעטעלייטס, אריינגערעכנט די פארגעשריטענע 'קאסמאס-2573', זענען אריבערגעפארן העכער די 'פרינץ סולטאן' עיר-פארס באזע אין סאודי אראביע, בלויז צוויי טעג בעפאר איראן האט דארט דורכגעפירט א שווערע אטאקע דעם פארגאנגענעם מערץ 27.

אמעריקאנער אפישעלס און אינטערנאציאנאלע אינטעלידזשענס קוועלער זאגן אז די סעטעלייטס, וואס טייל פון זיי זענען קאמפאבל צו כאפן גאר קלארע בילדער און אנדערע קענען אויפכאפן קאמיוניקאציעס און טרעפן לופט-פארטיידיגונג סיסטעמען, האבן געגעבן פאר איראן אן אומגעווענליך קלארע בילד פון די באזע בעפאר די אטאקע.

די אטאקע האט איבערגעלאזט ארום א טוץ אמעריקאנער סאלדאטן פארוואונדעט, און האט פארניכטעט א 'KC-135' ריפיולינג טאנקער עראפלאן, ווי אויך א טייערע 'AWACS' פרי-ווארענונג עראפלאן וואס איז ווערט הונדערטער מיליאנען דאלארן. אינטערעסאנט איז, אז דער עראפלאן איז ספעציעל געווארן אוועקגערוקט פון איר נארמאלע פארקינג פלאץ בעפאר די מלחמה האט זיך אנגעהויבן, אבער א דאנק די רוסישע שפיאנאזש איז עס דאך געטראפן און צעשמעטערט געווארן.

אפישעלס גיבן איבער אז דאס איז נישט קיין איינמאליגע פאסירונג. ענליכע רוסישע סעטעלייט אקטיוויטעטן האבן לויט באריכטן אויך געהאלפן איראן צו אטאקירן א לאקאציע אין ריאד וואס איז פארבינדן מיט די 'סי-איי-עי' (CIA).

פון איר זייט האט מאסקווע שארף געלייקנט אז זיי האבן צוגעשטעלט סיי וואספארא הילף פאר טעהראן, אבער דאס קומט אין א צייט וואס די באציאונגען צווישן רוסלאנד און איראן ווערן אלס נענטער און שטערקער. איראן האט כידוע צוגעשטעלט טויזנטער 'שאהעד' אטאקע דראונס וואס רוסלאנד נוצט ברייט אין איר קריג קעגן אוקריינע, און אפישעלס זאגן יעצט אז עס קוקט אויס ווי מאסקווע באצאלט צוריק א טובה מיט סעטעלייט אינטעלידזשענס וואס העלפט איראן צילן אמעריקאנער קרעפטן איבערן מיטל מזרח.

דער אוקריינישער פרעזידענט וולאדימיר זעלענסקי האט עפנטליך געשטיצט די שאצונגען, זאגנדיג אז ער איז זיכער אז רוסלאנד טיילט זיך מיט אזעלכע סארט אינטעלידזשענס מיט איראן. כאטש די באשולדיגונגען זענען נאך נישט זעלבסטשטענדיג באשטעטיגט געווארן אויסער די אפישעלס וואס ווערן ציטירט, ווייזט עס אבער אויף א ברייטערע קאאפעראציע צווישן צוויי פון אמעריקע'ס גרעסטע פיינט, עפעס וואס וואשינגטאן האלט יעצט א נאנטע אויג דערויף.