שווערע שלאכטן און אויפרייסן אין סאמאליע: פרישע קאמפן ברעכן אויס אין די שטאט ביידאא איבער קאנטראל פונעם ראיאן

סאמאליע. – שווערע פייער אויסטוישן און קאמפן האבן אויפגעטרייסלט די שטאט ביידאא, די הויפטשטאט פונעם 'בעי' ראיאן אין סאמאליע, מאנטאג פארטאגס דעם 28'סטן סעפטעמבער. לאקאלע קוועלעס באריכטן איבער העפטיגע שיסערייען, שווערע וואפנס און עקספלאוזשענס וואס האבן זיך געהערט אין עטלעכע טיילן פון די שטאט.

ווידעאס פונעם סצענע צייגן ווי געדיכטע שווארצע רויך הויבט זיך איבער די גאסן און געביידעס, און מיליטערישע טראקס זענען געזען געווארן פאטראלירן די גאסן בשעת ציווילע בירגער זענען געבליבן פארשפארט אין די הייזער מורא האבנדיג ארויסצוגיין.

די קאמפן קומען פאר צווישן קרעפטן וועלכע זענען לאיאל צום געוועזענעם פרעזידענט פונעם 'סאוט וועסט' סטעיט, אבדיאזיז לאפטאגארין, קעגן די טרופן פונעם יעצטיגן אדמיניסטראציע. די לאפטאגארין קרעפטן זאגן אז זיי האבן אטאקירט פאזיציעס פון די רעגירונג טרופן. לויט באריכטן זענען פארגעקומען צוזאמענשטויסן אויף עטלעכע פראנטן, אריינגערעכנט ביים 'אפאר-אירדא' דזשאנקשאן. א שפייז ווערהאוז נעבן די הויפטקווארטירן פון די 60'סטע דיוויזיע פונעם מיליטער איז אונטערגעצינדן געווארן און איז פארברענט געווארן. ווי אויך איז די 'אר-פי' האטעל שווער געשעדיגט געווארן נאך א מעכטיגע קאר-באמבע אויפרייס, מיט אומבאשטעטיגטע באריכטן אז עטלעכע ארבייטער אינעם האטעל זענען אומגעקומען אדער פארוואונדעט געווארן.

ביידע זייטן געבן ארויס קעגנזייטיגע באריכטן איבער די סיטואציע. די יעצטיגע אדמיניסטראציע און די סאמאלישע נאציאנאלע ארמיי זאגן אז טעראריסטן פון די 'אל-שאבאב' גרופע האבן זיך צוזאמגעשטעלט מיט די לאפטאגארין קרעפטן פאר א געמיינזאמע אטאקע, אבער זיי זענען צוריקגעשלאגן געווארן, און די ארמיי האלט ווייטער אן קאנטראל אויף די שטאט. פון די אנדערע זייט טענה'ט די לאפטאגארין לאגער אז זיי האבן געמאכט פארשריט און האבן חרוב געמאכט אן ארמערד קאר וואס איז געווארן צוגעשטעלט דורך טערקיי.

דערווייל זענען נישט דא קיין קלארע ציפערן איבער די צאל פארוואונדעטע אדער טויטע, אבער ערשטע באריכטן צייגן אויף א גרויסע צאל אומגעקומענע און פארוואונדעטע. די יעצטיגע קאמפן זענען א דירעקטע רעזולטאט פון א ביטערע קאמף איבער ווער עס זאל קאנטראלירן די 'סאוט וועסט' סטעיט. ענליכע שלאכטן האבן שוין אויסגעבראכן אין ביידאא אין אוגוסט ווען פעדעראלע קרעפטן זענען אריינגעקומען אין שטאט.

די שטאט ביידאא אנטהאלט א גרויסע צאל פליטים וואס זענען אנטלאפן פון אנדערע ערטער, און עס איז דא גרויסע זארג אז א לאנג-פארצויגענע קאמף קען פירן צו א שווערע הומאניטארישע קריזיס, און וועט אוועקנעמען די פאקוס פון די אנגייענדע אפעראציעס קעגן די אל-שאבאב טעראר גרופע.