דראמאטישע זוכענישן: 3 טויט און 10 פעלן נאכדעם וואס א שיפל מיט אימיגראנטן האט זיך איבערגעדרייט נעבן פארטא ריקא

א פארצווייפלטע רעטונג אפעראציע קומט יעצט פאר אין די וואסערן נעבן פארטא ריקא, נאכדעם וואס א קליין שיפל מיט 62 מענטשן דערויף האט זיך איבערגעדרייט זונטאג ביינאכט נעבן 'מאנא איילענד', ארום צען מייל פונעם ברעג.

די אמעריקאנער 'קאוסט גארד' זאגט אז די טראגעדיע האט זיך אנגעהויבן ווען א געשלעג האט אויסגעבראכן אויפן שיפל, און א פאסאזשיר באוואפנט מיט א מאטשעטע האט ערנסט פארוואונדעט עטליכע אנדערע. דאס האט געפירט דערצו אז פאניקירטע פאסאזשירן האבן אנגעהויבן שפרינגען אין וואסער אן קיין לייף-דזשעקעטס, אין א פארצווייפלטע פרואוו צו שווימען צום אינזל.

ביז דינסטאג האט די קאוסט גארד באוויזן צו ראטעווען 49 מענטשן, וועלכע זענען אריבערגעפירט געווארן צום ברעג און איבערגעגעבן געווארן פאר די 'האומלענד סעקיוריטי' און 'קאסטומס ענד בארדער פראטעקשאן' אגענטורן פאר ווייטערדיגע פראצעדורן. דריי מענטשן זענען ליידער באשטעטיגט געווארן טויט, בשעת צען אנדערע פעלן נאך אלץ, בעת עטליכע אגענטורן פירן אדורך אן אינטענסיווע זוכעניש אין די ווילדע וואסערן.

לופט בילדער פון די אפעראציע צייגן ווי העליקאפטערס פליען נידריג איבער די שטורמישע כוואליעס, רעטונג שווימערס שפרינגען אריין אין וואסער, און אויסגעמוטשעטע איבערלעבער האלטן זיך אן אין די שטיינער ביים ברעג ווארטנדיג צו ווערן געראטעוועט.

רוב פון די פאסאזשירן זענען געווען אימיגראנטן פון די דאמיניקען רעפובליק, און כאטש צוויי זענען פון האיטי. דאס איז א טייל פון א כסדר'דיגע און געפארפולע ערשיינונג וואו אימיגראנטן פרובירן אריבערצוקומען דעם שטורמישן 'מאנא פאסאזש' צווישן היספאניאלא און פארטא ריקא. דער דאזיגער פאסאזש איז באקאנט מיט אירע שטארקע שטראמען און אומפארראויסזעבארע וואסערן, וואס האט שוין געקאסט צענדליגע לעבנס דורכאויס די יארן ווען איבערגעפילטע שיפלעך פרובירן צו מאכן די רייזע אונטערן שלייער פון טונקלקייט.

באאמטע זאגן אז די זוכענישן גייען נאך אן מיט א פולן שוואונג נאך די צען פעלנדע, און עס קען נאך נעמען א שטיק צייט ביז מען וועט וויסן דעם פולן פארנעם פון די טראגעדיע.