היסטארישער דורכברוך: פאציענט קאנטראלירט זיין רעדערשטול בלויז מיט זיינע געדאנקען דורך א 'ניוראלינק' טשיפ

דער זיבעטער פאציענט פון די 'ניוראלינק' פראיעקט, דזשעיק שניידער, טעסט יעצט אויס עפעס וואס האט ביז נישט לאנג צוריק אויסגעזען ווי פשוט'ע סייענס פיקשאן: ער דרייווט זיין עלעקטרישע רעדערשטול ניצנדיג בלויז זיינע מחשבות.

די שווערע ALS קרענק האט צוגענומען פון שניידער די מעגליכקייט צו נוצן דעם דזשויסטיק און פוס-פעדאל פונעם רעדערשטול, איבערלאזנדיג אים אינגאנצן אנגעוויזן אויף אנדערע זיך צו קענען רירן פון ארט. אבער זיין נייע 'N1' אימפלאנט (טשיפ) לייענט די באוועגונג-אינסטרוקציעס אין זיין מוח (מאטאר קארטעקס) אין ריעל-טיים, און טוישט זיי צו קאמאנדן וואס דער רעדערשטול פאלגט פונקטליך אויס. שניידער שילדערט דעם טויש אלס א פרישע צוריקקער צו זעלבסטשטענדיגקייט, אריינגערעכנט די מעגליכקייט צו קענען ארויסגיין און פארברענגען אינדרויסן מיט זיין זון.

די 'ניוראלינק' פירמע האט באשטעטיגט אז די רעדערשטול קאנטראל איז איינע פון עטליכע עקספערימענטאלע פונקציעס וואס ווערן יעצט אויסגעפרובירט דורך די טרייעל באטייליגטע, אינאיינעם מיט קאמפיוטער באנוץ, ראבאטישע ארעמעס, און אנדערע דעווייסעס. שניידער, אן איינוואוינער פון אוסטין וועלכער איז דיאגנאזירט געווארן מיט ALS אין יאר 2022, איז דער זיבעטער פערזאן וואס איז פובליק באשטעטיגט געווארן צו באקומען דעם אימפלאנט. ער האט שוין פריער באוויזן צו קאנטראלירן א קאמפיוטער קורסאר און טייפן גאר שנעל, בעפאר ער איז אריבער צום רעדערשטול פראיעקט.

דער יעצטיגער שריט איז גאר א וויכטיגע, וויבאלד עס צייגט א פאראויסגאנג פון בלויז קאנטראלירן סקרינס און קיבאורדס, צו א רעאליטעט פון צוריקברענגען פיזישע באוועגונגען פאר מענטשן וואס ליידן פון שווערע פאראליז. דאך בלייבט דאס נאך אלס אן אנהייב-פאַזע קלינישע טרייעל, און גרויסע פראגעס בלייבן נאך אפן, אריינגערעכנט ווי פארלעסליך די סיסטעם איז אין א טעגליכע רוטין, ווי זיכער עס וועט זיך ארויסשטעלן צו זיין אויפ'ן לאנגן טערמין, און ווען - אויב בכלל - עס וועט קענען אנקומען צו א ברייטערע גרופע פון פאציענטן.