היסטארישע שריט ביי 'עפל': שטעלט פאר דעם ערשטן 'מעק' לעפטאפ מיט א טאטש-סקרין

נאך יארן לאנג פון זיך אנטקעגנשטעלן דעם געדאנק, האט די טעכנאלאגיע ריז 'עפל' ענדליך ארויסגעשטעלט א 'מעק' קאמפיוטער מיט א טאטש-סקרין. ביי א ספעציעלע לאנטש-איווענט דעם 28'סטן אקטאבער, האט מען שוין געקענט זען די ערשטע ווידעאוס וויאזוי מענטשן פראבירן אויס דעם נייעם 'מעקבוק פרא' (MacBook Pro), ניצנדיג די פינגערס דירעקט אויפ'ן סקרין צו שלעפן און קליקן אויף מוזיק פראגראמען און 3D מאודעלינג עפפס. דאס קומט נאך צענדליגע יארן וואס עפל האט זיך געהאלטן ביי זייערס אז א לעפטאפ דארף נישט קיין טאטש-סקרין, און די נייע שריט טוישט אינגאנצן דעם בילד, געבנדיג אן ערשטן בליק וויאזוי א טאטש-סקרין פאסט זיך אריין אין א מעק.

דער נייער מעקבוק פרא קומט מיט א קלארע 'OLED' דיספלעי, א 'דיינעמיק איילענד' (Dynamic Island) ביים אויבערשטן טייל פונעם סקרין, און גיט די אפציע צו קלייבן צווישן די מעכטיגע 'M5 פרא' אדער 'M5 מעקס' טשיפס. די פרייזן זענען אבער נישט ביליג: דער 14-אינטש מאודל הייבט זיך אן ביי 2,899 דאלאר, און דער 16-אינטש מאודל ביי 3,399 דאלאר. דאס איז מיט 400 דאלאר טייערער ווי די רעגולערע מאודלס אן דעם טאטש-סקרין. ביידע וועלן זיין צו באקומען אין די געשעפטן אנגעהויבן פון נאוועמבער 6.

עפל צילט דערמיט הויפטזעכטליך פאר 'קריעיטארס', ווי גראפיק דיזיינערס און מוזיקאנטן. דער טאטש-סקרין ארבעט אינאיינעם מיט דעם טראדיציאנעלן קיבאורד און טרעקפעד, ניצנדיג א ספעציעל-צוגעפאסטע 'מעק' (macOS) אינטערפעיס. די גרויסע פראגע וואס פילע פרעגן יעצט איז, צי מענטשן וועלן טאקע כסדר אויסשטרעקן די הענט צום סקרין איינמאל די נייעקייט וועט אויסוועפן, און צי עס לוינט זיך באמת צו צאלן די הויכע פרייז פאר דעם טאטש פיטשור.