אומבאשטעטיגטע ווידעא צירקולירט אנליין: אוקראינישע סאלדאטן אין א מיליטערישע טראק סעקונדעס בעפאר א רוסישע 'עמבוש'

א שוידערליכע ווידעא וואס צירקולירט אויף די סאציאלע מידיא נעצן צייגט אנגעבליך א גרופע אוקראינישע סאלדאטן אינעווייניג אין א מיליטערישע טראנספארט טראק, בלויז סעקונדעס בעפאר זיי זענען אריינגעפאלן אין א רוסישע 'עמבוש'. לויט דעם אקאונט וואס האט ארויסגעלייגט די ווידעא, איז די רעקארדירונג געפונען געווארן דורך די רוסישע קרעפטן, און אלע סאלדאטן וואס זענען געווען אין די טראק זענען אומגעקומען.

אין די קורצע קליפ קען מען זען די סאלדאטן אנגעטון אין קאמופלאזש, אנגעוואפנט מיט ביקסן און אוקראינישע פענער אויף זייערע יוניפארמס, זיצנדיג אין א טונקעלע ארמערד-וועהיקל, קוקנדיג זייער פאקוסירט און אלארמירט. פלוצלינג זעט מען א כאאס, מיט בליצן און קלאפערייען וואס צייגט קלאר אז די טראק איז אונטער א שווערע אטאקע.

אבער וויכטיגע פראגעס בלייבן דערווייל אומגעענטפערט, און די הויפט פראגע איז צי מען קען בכלל געטרויען די באהויפטונגען. דער פאקט אז אלע סאלדאטן זענען געהרגעט געווארן קומט בלויז פונעם אקאונט'ס אייגענע באשרייבונג, און די ווידעא אליינס צייגט נאר דעם אנהייב פון די אטאקע אבער נישט די רעזולטאטן.

דער דאטום, די לאקאציע, און פון וואו די רעקארדירונג שטאמט זענען נאכנישט זעלבסטשטענדיג באשטעטיגט געווארן, און קיין איינע פון די צוויי זייטן - סיי די אוקראינישע און סיי די רוסישע - האבן נישט באשטעטיגט די דעטאלן. ווי באקאנט ווערן אסאך ווידעאס פונעם קריג אין אוקראינע ארויסגעלייגט דורך איין זייט אלס פראפאגאנדע, וואס מאכט עס זייער שווער צו באשטעטיגן. דעריבער, ביז עס קומט ארויס א קראנטע באשטעטיגונג, דארף מען אנקוקן די ווידעא אלס אן אומבאשטעטיגטע קלאנג און נישט אלס א פאקט.