שרעקעדיגער אינצידענט אין מיזורי: צווייטע-שטאק באלקאן פאלט איין אונטער א גרופע פאליציי אפיצירן אינמיטן אן אבלאווע

א רוטינע פאליציי אפעראציע אין מיזורי האט גענומען א שרעקעדיגן און אומגעריכטן קער, ווען א צווייטע-שטאק באלקאן האט זיך פלוצלינג אונטערגעבראכן און איז איינגעפאלן אונטער א גרופע אפיצירן וועלכע זענען געקומען סערווירן ארעסט ווארענטס.

די פעדעראלע טעסק פארס, צוזאמגעשטעלט פון יו. עס. מארשאלס און לאקאלע רענדאלף קאונטי פאליציי, האבן זיך פארזאמלט אויפ'ן באלקאן אינמיטן א זוך-אקציע נאכן 26-יעריגן דזשעיקאב אלעקסאנדער מונוז. אין בלויז ארום צוויי סעקונדעס האט זיך די האלצערנע סטרוקטור אפגעריסן פונעם געביידע, און די אפיצירן זענען אראפגעפאלן אין א כאאטישן הויפן פון האלץ און ברוכווארג.

די אקציע איז געווען א טייל פון "אפעראציע עדעמס וואטש", א געמיינזאמע מיסיע פון עטליכע אגענטורן צו כאפן פארברעכער וואס האבן פארלעצט זייערע פראבעישן תנאים. די אויטאריטעטן האבן געזוכט דעם פארברעכער מונוז נאכדעם וואס ער האט אויפגעהערט זיך צו מעלדן צו זיין פאראל אפיציר און עס איז ארויסגעגעבן געווארן א ווארענט אויף זיין ארעסט. בעת די אפיצירן האבן זיך פאזיציאנירט אינדרויסן פון זיין דירה, זענען געווען צווישן ניין און צען אפיצירן אויפ'ן צווייטן שטאק באלקאן, ווען עס האט זיך פלוצלינג אונטערגעבראכן אן קיין שום פריערדיגע ווארענונג.

דער ברוך האט איבערגעלאזט עטליכע אפיצירן פארוואונדעט, אריינגערעכנט פינף וועלכע האבן געדארפט ווערן אפגעפירט אין שפיטאל מיט צעבראכענע ביינער, צעריסענע מוסקלען און קאנקאשענס. דער פלוצלינגדיגער פאל איז געווען באזונדער געפארפול, וויבאלד די אפיצירן זענען געווען באוואפנט מיט געווער און אנדערע שווערע פאליצייאישע עקוויפמענט בעת זיי זענען אראפגעפאלן. טראץ דעם שרעקליכן קראך, האט מען אויסגעמיטן א פיל ערגערן טראגעדיע, א דאנק אנדערע פאליציי אפיצירן וועלכע זענען געווען אויפ'ן ארט און זענען גלייך צוגעלאפן ארויסהעלפן די פארוואונדעטע וואס זענען געווען פארכאפט אונטער די ברוכווארג.

למעשה האט זיך ארויסגעשטעלט אז דער געזוכטער מונוז איז גארנישט געווען אין די דירה ווען די פאליציי איז אנגעקומען, און דער דראמאטישער אינצידענט האט נישט געפירט צו זיין ארעסט. ער האט זיך אבער שפעטער אליינס איבערגעגעבן פאר די אויטאריטעטן, וואס האט געברענגט די אבלאווע צו אן ענדע. דער אינצידענט האט ארויסגעברענגט די אומגעריכטע געפארן מיט וואס פאליציי אפיצירן קענען זיך אנגעשטויסן אינמיטן סערווירן ווארענטס, וואו א פשוט'ע רוטינע אפעראציע קען זיך פארוואנדלען אין א לעבנס-געפאר אין בלויז עטליכע סעקונדעס.