דראמאטישע סצענעס אין מיאמי עירפארט: עמעזאן קארגא פליגער קראכט און גייט אויף אין פלאמען נאכן אראפפארן פונעם ראנוועי

מיאמי - אן עמעזאן פרעים עיר קארגא פליגער האט זונטאג נאכמיטאג אראפגעקראכט פונעם ראנוועי ביים לאנדן אינעם מיאמי אינטערנאציאנאלן עירפארט. דער פליגער האט זיך אפגעשטעלט אינדרויסן פונעם עירפארט טעריטאריע און איז תיכף ארומגענומען געווארן מיט פלאמען און שווארצע רויך, ווי מען קען זען אויף פארשידענע דראמאטישע ווידעא קליפס פונעם סצענע.

לויט די פאדעראלע אוויאציע אדמיניסטראציע (FAA), איז דער באאינג 767-300 פליגער - פלייט 7598 אפערירט דורך די '21 עיר' קאמפאני פאר עמעזאן - געקומען צו פליען פון סאן כואן, פארטא ריקא. ארום 2:00 אזייגער נאכמיטאג האט עס געלאנדעט אין מיאמי, אבער אנשטאט זיך אפשטעלן אויפן ראנוועי, איז עס ווייטער געפארן, אריבערגעפארן א לאקאלע גאס (נארטוועסט 67'סטע עוועניו) און זיך ענדליך אפגעשטעלט אין א דערנעבנדיגע פעלד.

עמערדזשענסי פערסאנעל און די מיאמי-דעיד פייער דעפארטמענט זענען שנעל אראפגערופן געווארן צום ארט צו באקעמפן דאס פייער. באריכטן געבן אן אז די פאדערשטע רעדער פונעם פליגער זענען צוזאמגעפאלן. אן אודיא רעקארדירונג פון די עיר טראפיק קאנטראל צייגט ווי אן ארבייטער אויף דער ערד האט אלארמירט דעם טאוער אז א פליגער איז אראפגעפארן פונעם ראנוועי, וואס האט געפירט צו א שנעלע עמערדזשענסי רעספאנס.

אלס רעזולטאט פונעם אינצידענט האט די FAA ארויסגעגעבן א צייטווייליגע 'גראונד סטאפ', אפשטעלנדיג אלע פליגערס פון לאנדן אין מיאמי עירפארט פאר ארום א שעה צייט, ביז 3:00 נאכמיטאג, ווען די אפעראציעס האבן זיך צוריק אנגעהויבן.

דערווייל איז נאכנישט דא קיין אפיציעלע באריכטן איבער די צושטאנד פון די פילאטן און מאנשאפט וואס זענען געווען אויפן פליגער, וועלכע זענען געווען די איינציגסטע פאסאזשירן אויף דעם קארגא פלייט. עס איז אויך נישט קלאר צי איינער אויף דער ערד איז געשעדיגט געווארן ווען דער פליגער האט איבערגעריסן די פובליק גאס.

די 'נעשאנאל טראנספארטאציע סעיפטי בארד' (NTSB) אינאיינעם מיט די FAA וועלן פירן אן אויספארשונג צו דערגיין וואס האט געפירט צום קראך, אריינגערעכנט מעגליכע מעכאנישע פראבלעמען, די צושטאנד פונעם ראנוועי, אדער אנדערע פאקטארן. דערווייל האבן די אפיציעלע אגענטורן און עמעזאן נאכנישט ארויסגעגעבן קיין אפיציעלע סטעיטמענט, און מען ערווארט מער דעטאלן ווי נאר די אויספארשונג גייט פאראויס.