זעלטענע שריט: איראנער פרעזידענט רייסט אראפ די אייגענע פראפאגאנדע מאשין; גיט צו אז אינפלאציע אין לאנד האלט ביי 100 פראצענט

דער איראנער פרעזידענט מאסוד פעזעשקיאן האט אין אן אומגעווענליכע שריט שארף אראפגעריסן זיין אייגענע לאנד'ס סטעיט טעלעוויזיע. ער האט קריטיקירט די נעטווארק פארן כסדר רעדן איבער די נישטיגע 2 פראצענט אינפלאציע אין אמעריקע, בשעת זיי פארווישן די שרעקליכע עקאנאמישע קריזיס אין איראן זעלבסט.

פעזעשקיאן האט אנגעוויזן אז די אינפלאציע אין איראן האט שוין למעשה דערגרייכט ארום 100 פראצענט, אנווייזנדיג אז דער קריזיס קומט דירעקט פון די אנגייענדע סאנקציעס און פראבלעמען מיט אימפארט. דאס איז א זעלטענע ערשיינונג וואו אן איראנער פרעזידענט גייט אפן ארויס קעגן די פראפאגאנדע פון די רעגירונג'ס מידיא, וואס ווערט קאנטראלירט דורך די עקסטרעמע פראקציעס אין לאנד. עס צייגט א קלארע טויש אין זיין צוגאנג, וואו ער איז מער מודה אינעם ביטערן עקאנאמישן מצב אנשטאט עס צו באהאלטן.

לויט די אפיציעלע סטאטיסטיקס אין איראן, האלט די יערליכע אינפלאציע ערגעץ צווישן 49 און 88 פראצענט, אבער פרייזן אויף געוויסע שפייז ארטיקלען זענען ארויפגעשפרינגען מיט מער ווי 120 פראצענט, אינאיינעם מיט א שרעקליכע טראסק פונעם איראנער וואלוטע. דער איראנער ריאל האלט אין איין פארלירן איר ווערד, וואס מאכט פיל טייערער צו אימפארטירן סחורה אין א לאנד וואס איז שטארק אנגעוויזן אויף אויסערן האנדל פאר אלעס און אומעטום, פון עסן ביז אינדוסטריעלע מאטעריאלן. זעלבסטשטענדיגע עקאנאמיסטן צייגן אן אז די פאלנדיגע אויל עקספארט און די שוואכע וואלוטע האבן געגעבן א טויט-קלאפ פאר די איינקויף קראפט פונעם פשוט'ן איראנער בירגער. וויאזוי מען זאל עס נאר נישט רעכענען, איז קלאר אז די פרייזן פליען שוין פאר חדשים און קיין ישועה זעט זיך נישט אויפן האריזאנט.

די יעצטיגע קאמענטארן קומען אין א צייט וואס פעזעשקיאן רעדט מער און מער אפן איבער די שווערע חורבנות וואס די סאנקציעס און די ברייטערע קאנפליקט מיט אמעריקע און מדינת ישראל האבן אנגעמאכט פאר די איראנער עקאנאמיע. אין א רעדע צום פאלק האט ער לעצטנס געזאגט אז דאס לאנד געפינט זיך אין א פולשטענדיגע עקאנאמישע, מיליטערישע און זיכערהייט מלחמה. ער האט אפן גערעדט וועגן ערנסטע מאנגל אין וואסער, עלעקטריציטעט, גאז און אינעם באנקינג סיסטעם.

ער האט אפילו געפאדערט פונעם פאלק זיך צוצוגעוואוינען צו "מלחמה אומשטענדן", מסביר זייענדיג אז די שוועריגקייטן זענען אן אומפארמיידבארע רעזולטאט פון די פרעשור וואס איראן גייט יעצט אדורך, און נישט עפעס וואס די רעגירונג קען פשוט פאררעכטן. דאס איז א שטארקע טויש פון זיינע פריערדיגע סטעיטמענטס, ווען ער פלעגט אוועקמאכן די אמעריקאנער סאנקציעס ווי כאילו זיי מאכן נישט קיין סאך אויס.

אויסער רייד, האט פעזעשקיאן'ס רעגירונג אויך גענומען פראקטישע שריט וואס צייגן ווי טיף דער קריזיס איז. דאס נעמט אריין דאס אפשטעלן סובסידיעס אויף אויסלאנד וואלוטע וואס האט געקאסט פאר די רעגירונג ארום 18 ביליאן דאלער, און פלענער צו העכערן די פרייזן פון גאזאלין צום ערשטן מאל אין יארן. די פאליסי טוישונגען, אינאיינעם מיט זיינע אפענע רייד, ווייזן אז דער פירער פרובירט צו קאנטראלירן די ערווארטונגען פונעם פאלק אין ליכט פון די שווערע עקאנאמישע מצב, אנשטאט צו ווייטער איינרעדן אז אלעס איז אונטער קאנטראל. נאכדעם וואס פראטעסטן איבער די הויכע פרייזן האבן שוין אויפגעטרייסלט דאס לאנד אין די לעצטע מאנאטן, זעט אויס אז פעזעשקיאן'ס גרייטקייט ארויסצוטרעטן קעגן זיין אייגענע מידיא איז ווייניגער א קריטיק אויף פראפאגאנדע, און מער א מיטל צו צוגרייטן דעם איראנער פאלק אויף נאך שווערערע עקאנאמישע צייטן וואס קומען אקעגן.