היסטאריש: נייע היידראדזשען קאר ברעכט דעם וועלט'ס ספיד רעקארד מיט אן אומגלויבליכע 406 מייל פער שעה

אן אינוועסטמענט פון אסטראנאמישע 100 מיליאן דאלאר האט זיך אויסגעצאלט אויף א ספעקטאקולערן פארנעם, נאכדעם וואס די נייע "JCB Hydromax" קאר האט צעשמעטערט דעם ספיד רעקארד פאר א היידראדזשען-געטריבענע קאר ביי די באקאנטע 'באנעוויל סאלט פלעטס' אין יוטא.

די קאר האט געמאכט צוויי רייזעס. ביי די ערשטע האט עס דעגרייכט א שנעלקייט פון 400.632 מייל פער שעה, און ביי די צווייטע איז עס געפארן נאך שנעלער, גרייכנדיג 412.135 מייל פער שעה. דאס שטעלט זיך אויס אויף א דורכשניטליכע ספיד פון 406.32 מייל פער שעה. מיט דעם האט עס אינגאנצן איבערגעשטיגן דעם פריערדיגן רעקארד פאר א היידראדזשען קאר, וואס איז געשטאנען אויף בלויז 185.5 מייל פער שעה, אראפגעשטעלט דורך א BMW קאר נאך אין יאר 2004. דער נייער רעקארד איז מער ווי דאפלט פונעם אלטן, און דאס אלעס אין איין איינציגע פרואוו.

אונטערן רעדל איז געזעצן דער געוועזענער מיליטערישער פיילאט ענדי גרין, א באקאנטער נאמען אין די ספיד רעקארד וועלט. ער האט איבערגעגעבן אז טראץ די ווילדע שנעלקייט, איז די קאר געפארן גאר רואיג און מען האט עס קוים געדארפט קאנטראלירן. "דאס איז דער אנהייב פון א נייע תקופה," האט גרין געזאגט, אנווייזנדיג אויף די צוקונפט פון היידראדזשען קארס. ער האט צוגעלייגט אז די יעצטיגע דערגרייכונג האט למעשה באשאפן א נייע קאטעגאריע אין די רעיסינג וועלט, וואס וועט קענען קאנקורירן מיט די טראדיציאנאלע גאזאלין מאטארן.

עקספערטן זאגן אז דער נייער רעקארד איז פיל מער ווי סתם א פראנט-פעידזש קעפל; עס איז א קלארע באווייז אז היידראדזשען קען דינען אלס אן ערנסטע און מעכטיגע ברענשטאף, און אז 'זערא-עמישענס' טעכנאלאגיע קען זיך פארמעסטן מיט די העכסטע שטאפלען פון ספיד און ענדזשינירינג. ווי דער דרייווער גרין האט עס אראפגעשטעלט: "די קאר האט אוועקגעבלאזן יעדע אנדערע היידראדזשען קאר פון די מאפע," און האט ארויפגערוקט דעם סטאנדארט צו א שטאפל וואס אנדערע קאמפאניס וועלן יעצט דארפן נאכיאגן.