שוידערליכע ווידעא: א טאנקער טראק ראטעוועט זיך אין די לעצטע סעקונדעס פון א פאטאלע צוזאמענשטויס מיט א טרעין אין פוילן

א טאנקער טראק איז געקומען בלויז סעקונדעס נאנט פון ווערן צעשמעטערט דורך א פאסאזשירן טרעין, נאכדעם וואס ער איז געבליבן שטעקן ביי א טרעין קראסינג אין פוזנא, פוילן, דעם פארגאנגענעם אקטאבער 26, 2026.

אין א שרעקעדיגע ווידעא וואס איז ארויסגעגעבן געווארן דורך די פוילישע באן פירמע 'PKP PLK', זעט מען ווי א שווערע טראפיק האט איבערגעלאזט דעם גרויסן זילבערנעם טאנקער טראק געשטראנדעט צווישן די אראפגעלאזטע באריערס פונעם טרעין קראסינג. אן אנדערער דרייווער האט נאך פרובירט אויפצוהייבן איינע פון די געיטס אים צו העלפן, אבער זעענדיג ווי די טרעין קומט צו פליען מיט א שנעלקייט, האט דער טראק דרייווער באשלאסן צו נעמען שריט, און ער האט פשוט דורכגעבראכן דעם באריער און זיך א רוק געטאן פאראויס. דער טראק האט זיך ארויסגעראטעוועט פון די שינעס בלויז עטליכע מאמענטן בעפאר די טרעין איז אדורכגעפארן מיט א מורא'דיגע ספיד - א נס וואס מען קען קוים גלייבן ביים קוקן די ווידעא.

דער אינצידענט האט געפירט צו פארהאלטונגען פאר מער ווי 20 טרעינס און האט אנגעמאכט שאדנס פאר די געיטס, לויט באריכטן. די באן פירמע האט איבערגעחזר'ט זייער זיכערהייט ווארענונג, אז דרייווערס וואס בלייבן שטעקן צווישן די געיטס ביי א קראסינג זאלן תיכף דורכברעכן דעם באריער און נישט ווארטן קיין סעקונדע.

דער 31-יעריגער אוקראינישער טראק דרייווער ווערט יעצט אויסגעפארשט דורך די פאליציי, און די ענדגילטיגע רעזולטאטן פון די אויספארשונג זענען נאך נישט ארויסגעגעבן געווארן.

די שרעקעדיגע פאסירונג קומט נאך עטליכע ערנסטע עקסידענטן ביי טרעין קראסינגס אין פוילן דעם יאר, וואס ברענגט צוריק ארויף אויפ'ן טיש די וויכטיגע פראגע וויאזוי דרייווערס דארפן זיך פירן ווען א קראסינג פארמאכט זיך אויף זיי. עס לאזט אויך איבער א גרויסע פראגע צייכן פאר דרייווערס: וויפיל סעקונדעס האט מען באמת פון ווען די געיטס גייען אראפ ביז די טרעין קומט אן.