פראנצויזישע נעיווי פארכאפט א רוסישע "שאטן פלאטע" שיף אינעם אינדישן אקעאן; רוסלאנד רעאגירט מיט צארן

פראנקרייך האט דערקלערט איר אנטשלאסנקייט צו באקעמפן די אזוי-גערופענע "שאטן פלאטע" (ghost fleet) איבער די גאנצע וועלט, און היינט אינדערפרי האט די פראנצויזישע נעיווי פארוואנדלט די ווערטער אין א פאקטישע אקציע, ווען זיי האבן זיך ארויפגעכאפט אויף א טאנקיר שיף מער ווי 450 נאוטישע מייל דרום פון די 'ריוניאן' אינזלען.

די פראנצויזישע קרעפטן האבן איבערגענומען קאנטראל אויף די שיף, וועלכע ווערט אנגערופן "DF Peak", צוליב פארדאכטן אז זי פארט אונטער א פאלשע פאן און נעמט אנטייל אין אומלעגאלע אויל טראנספארטאציע וואס איז פארבינדן צו רוסלאנד'ס פרואוון זיך ארויסצודרייען פון די מערב-וועלט סאנקציעס. פראנצויזישע באאמטע האבן אונטערגעשטראכן אז די אפעראציע איז דורכגעפירט געווארן אין פולן איינקלאנג מיט אינטערנאציאנאלע מאריטים געזעצן, און די שיף ווערט יעצט באגלייט קיין ריוניאן פאר א גרונטליכע אויספארשונג.

דער פראנצויזישער פרעזידענט עמאנועל מאקרון האט ארויסגעברענגט אז די אקציע איז א קלארע באווייז אז פראנקרייך וועט אנהאלטן דעם געזעץ און באקעמפן אומלעגאלע שמוגלערייען, אומגעזען וואו עס קומט פאר. די טאנקיר שיף האט שוין אין די פארגאנגענהייט אפערירט אונטער פארשידענע נעמען און פאנען, וואס האט אויפגעברענגט ערנסטע פראגע צייכנס איבער אירע עכטע אייגנטומער.

די רוסישע רעגירונג האט נישט געשפעטיגט צו רעאגירן און האט שארף פארדאמט די פארכאפונג, אנרופנדיג עס אן אקט פון "פיראטעריי" און א פארלעצונג פון אינטערנאציאנאלע נארמעס. דער קאנפראנטאציע לייגט צו פרישע אנגעצויגנקייט צו דעם אנגייענדן געראנגל איבער שיפן וואס האלטן אין איין טראנספארטירן סאנקציאנירטע אויל טראץ די מערב-וועלט סאנקציעס.

די יעצטיגע אינטערסעפשאן איז א טייל פון א ברייטערע פראנצויזישע קאמפיין קעגן די אלטע און שוואך-רעגולירטע שיפן וואס העלפן האלטן די רוסישע ענערגיע עקספארטן אין גאנג. דורכן אקציאנירן אזוי ווייט אינעם אינדישן אקעאן, האט פאריז געשיקט א קלארן מעסעדזש אז ווייטקייט איז נישט קיין שוץ-ארט פאר פארדעכטיגטע אומלעגאלע אפערירער. די מאנשאפט פון די "DF Peak" געפינט זיך נאך אלץ אויפן שיף בעת עס פארט אונטער אן עסקארט קיין פראנצויזישע טעריטאריע, וואו אינוועסטיגעיטארס וועלן איבערקוקן די דאקומענטן, די קארגא היסטאריע, און די סטאטוס פון איר פאן אסאך מער פונקטליך.

מאסקווע'ס שארפע פראטעסט צייגט ווי יעדע נייע פארכאפונג קען מעגליך עסקאלירן די מאריטימע אנגעצויגנקייט צווישן אייראפע און רוסלאנד. פראנצויזישע באאמטע האלטן זיך ביי זייערס אז יעדע טריט איז געווען לויט די אנגענומענע לעגאלע פראצעדורן. ווי נאר די טאנקיר דערנענטערט זיך קיין ריוניאן, וועט דער קעיס דינען אלס א פראקטישע פראבע ווי ווייט מען קען אינפארסירן די סאנקציעס און די דיפלאמאטישע קאנסעקווענצן וואס קומען נאך אזעלכע קאנפראנטאציעס אויפן הויכן ים.