אילאן מאסק אנטפלעקט: כינעזע עקספארט רעסטריקציעס האבן פארהאלטן טעסלא'ס ראבאט פראגראם

דער טעסלא פירער אילאן מאסק האט אנטפלעקט אז כינע'ס רעסטריקציעס אויף די עקספארט פון ספעציעלע מאגנעטן האבן פארהאלטן טעסלא'ס 'אפטימוס' הומענויד ראבאט פראגראם מיט צוויי ביז דריי מאנאטן פאראיאר.

רעדנדיג ביי א פרישע אויפטריט, האט מאסק אראפגעלייגט דעם מצב זייער קלאר, זאגנדיג אז די קאמפאני איז פשוט געבליבן מיט "ראבאטן אן קיין הענט", וויבאלד די ספעציעלע מאגנעטן וואס פעלן זיך אויס צו געבן קראפט פאר די גלידער זענען נישט געווען צובאקומען. די עקספארט קאנטראלן, וואס כינע האט ארויפגעלייגט אין אפריל 2025, האבן זיך געצילט אויף מאטעריאלן ווי דיספראזיום און טערביום וואס זענען קריטיש וויכטיג פאר די קליינע, שטארקע מאטארן אין די ראבאט'ס דזשוינטס.

אנדערש ווי די עלעקטריק קאר אינדוסטריע וואס האט שוין אן אויסגעארבעטע סופליי טשעין, פעלט נאך פאר די ראבאטיקס סעקטאר געהעריגע אלטערנאטיווע קוואלן פאר די סארט טיילן. מאסק האט אונטערגעשטראכן אז די פאסירונג צייגט ווי וויכטיג עס איז צו קענען פראדוצירן יעדע וויכטיגע טייל דא אינעם אמעריקאנער לאנד, כדי אויסצומיידן אזעלכע פראבלעמען אין די צוקונפט. די פארהאלטונג האט ארויסגעברענגט ווי שנעל געא-פאליטישע אנגעצויגנקייטן קענען אפשטעלן פראגרעס אויף פארגעשריטענע פראדזשעקטס וואס זענען אנגעוויזן אויף גלאבאלע סופליי.

זינט דעמאלט האט טעסלא געארבעט צו טרעפן אנדערע סופלייערס און לייסענסעס, בשעת זיי פארשנעלערן די ארבעט צו בויען לאקאלע פראדוקציע פאר די מאגנעטן און אנדערע טיילן. מאסק האט באטאנט אז וויבאלד עס איז נישטא קיין גרייטע אינדוסטריע פאר ראבאט טיילן, גייט די פראדוקציע פיל פאמעליכער און איז מער סענסיטיוו ווי ביי קארס.

כינע'ס קאנטראל איבער די מאטעריאלן שטעלט אהער א סטראטעגישע ריזיקע סיי פאר קאמערציאלע ראבאטיקס און סיי פאר מיליטערישע געברויכן. די איבערלעבעניש האט נאר פארשטארקט טעסלא'ס סטראטעגיע צו פראדוצירן אלע קריטישע טעכנאלאגיעס דא אין אמעריקע. ווי די 'אפטימוס' פראגראם רוקט זיך פאראויס צו מאסן-פראדוקציע, וועט די מעגליכקייט צו פראדוצירן יעדע חלק אן דארפן אנקומען צו אויסלענדישע סופלייערס באשטימען ווי שנעל די פראגראם קען וואקסן. מאסק האט געענדיגט אז דאס איז א קלארע רוף אז אמעריקע מוז זיין זעלבסטשטענדיג אין איר אינדוסטריע אין ליכט פון די אומזיכערקייטן אין די גלאבאלע סופליי טשעין.