דער איראנער פארלאמענט ספיקער און הויפט פארהאנדלער, מוחאמאד באגער גאליבאף, האט זונטאג איבערגעגעבן א שארפן מעסעדזש פאר וואשינגטאן, קלארמאכנדיג אז דער סטראטעגישער הארמוז דורכגאס וועט זיך נישט צוריק עפענען לויט אמעריקע'ס צייט-פלאן.

"די אמעריקאנער, וועלכע זאגן איין זאך אין די מידיע, האבן לעצטנס אריינגעגעבן פרישע פראפאזעלס דורך א פארמיטלער," האט גאליבאף געזאגט פאר געזעצגעבער אין טעהראן. "אבער זיי מוזן פארשטיין אז די עפאכע פון שלעפן די צייט און דיקטירן איינזייטיגע פאדערונגען איז פאריבער. אונזער פאזיציע איז קלאר: דער הארמוז דורכגאס וועט זיך נישט עפענען ביז אונזערע זיבן באדינגונגען אונטערן 'איסלאמאבאד מעמאראנדום' ווערן פולשטענדיג נאכגעגעבן."

די קאמענטארן קומען בלויז עטליכע טעג נאכדעם וואס אמעריקע האט רעאגירט, דורך קאטאר'ע פארמיטלער, צו א פראפאזעל וואס איראן האט ארויפגעברענגט ביי די יו-ען דזשענעראל אסעמבלי. אין יענעם פראפאזעל האט איראן אנגעטראגן צוריקצושטעלן נארמאלע שיפראטע דורכ'ן דורכגאס אדורך זיבן טעג, בתנאי אז אירע פאדערונגען ווערן אקצעפטירט.

די זיבן פאדערונגען זענען אבער גארנישט קיין קלייניקייט. לויט באריכטן רעכענען זיי אריין: אפשטעלן אמעריקאנער מיליטערישע אקציעס אויף אלע פראנטן, אויפהייבן די נעיווי בלאקאדע אויף איראנער פארטן, באפרייען איראן'ס פארפרוירענע געלטער, פארגרינגערן די סאנקציעס אויף אירע אויל עקספארטן, און אפשטעלן דאס וואס טעהראן רופט אן "עקאנאמישע קריג" און אריינמישונג אין אירע אינערליכע אנגעלעגנהייטן.

דער איצטיגער קריזיס ציט זיך צוריק צו אן אפמאך פון חודש יוני, באקאנט אלס דער "איסלאמאבאד מעמאראנדום", וואס איז צושטאנד געקומען דורך פאקיסטאן און איז אונטערגעשריבן געווארן דורך טראמפ און דעם איראנער פרעזידענט מאסוד פאזעשקיאן. דער אפמאך האט אויף א קורצע צייט אפגעשטעלט די קאמפן בעפאר עס איז אינגאנצן צוזאמגעפאלן.

מיטן הארמוז דורכגאס בלאקירט שוין פאר מער ווי זיבן חדשים - א דורכגאס וואס פלעגט פירן א פינפטל פון די וועלט'ס אויל סופליי בעפאר די מלחמה האט אויסגעבראכן - לאזט גאליבאף'ס עקשנות איבער איינע פון די וויכטיגסטע שיפראטעס אויף די וועלט אלס א משכון אין א דיפלאמאטישן דעדלאק וואס צייגט דערווייל נישט קיין שום צייכנס פון ווערן געלייזט.