העריקעין 'לאלא' רייסט איין בריקן און לאזט איבער א האוואי שטעטל אינגאנצן אפגעשניטן פון דער וועלט

א נייע 'דראון' ווידעא וואס איז ארויסגעגעבן געווארן צייגט דעם שוידערליכן פארנעם פון חורבן לענגאויס 'הייוועי 11' נעבן דעם שטעטל פאהאלא אין האוואי, נאכדעם וואס העריקעין 'לאלא' האט אדורכגעריסן דעם ראיאן. דער שטורעם האט אפגעשווענקט עטליכע בריקן און אינגאנצן חרוב געמאכט גרויסע שטרעקעס פונעם שאסיי.

אין די צוויי-מינוטיגע ווידעא קען מען זען ווי די מאסיווע פארפלייצונגען האבן איבערגעלאזט ריזיגע הויפנס פון אויסגעריסענע ביימער, שטיינער און שווערע בלאטע וואס בלאקירן דעם הייוועי אויף עטליכע ערטער, אינאיינעם מיט א שווערע נעפל און רעגן וואס האלטן נאך אן. עמערדזשענסי קרוס און שווערע מאשינערי זענען אויפן ארט און ארבעטן פלייסיג אפצורוימען דעם וועג, אבער באאמטע זאגן אז צוליב די ערנסטע שאדנס צו די בריקן וועט דער וועג בלייבן פארמאכט פאר א לענגערע צייט.

די שווערע חורבנות האבן פאקטיש אינגאנצן אפגעשניטן דאס שטעטל פאהאלא, וואס פארמאגט ארום 2,000 איינוואוינער און דעם איינציגסטן שפיטאל אינעם ראיאן. באאמטע ארבעטן יעצט פיבערהאפט צו טרעפן אנדערע וועגן וויאזוי אריינצוברענגען מעדיצינישע הילף און עמערדזשענסי געברויכן. וויבאלד הייוועי 11 איז אוממעגליך צו נוצן, האבן די אויטאריטעטן אקטיוויזירט פלענער צו נוצן העליקאפטערס פאר קריטישע געברויכן, און מען ארבעט אינאיינעם מיט די 'קאוסט גארד' צו ברענגען הילף דורכן וואסער אויב מען וועט נישט קענען עפענען דעם וועג אין די נאנטע צוקונפט. צו די אלע צרות איז אויך דא א ברייטע מאנגל אין עלעקטריציטעט, וואס מאכט פיל שווערער די ארבעט אינעם שפיטאל און די קאמוניקאציע מיט די איינוואוינער אינעם אפגעזונדערטן שטעטל.

לאקאלע און סטעיט עמערדזשענסי באאמטע זאגן אז צוריקשטעלן כאטש א טיילווייזע צוטריט צום שטעטל איז יעצט די העכסטע פריאריטעט, און די קרוס ארבעטן ארום די זייגער אונטער גאר שווערע אומשטענדן. מען האלט נאך אינמיטן שאצן דעם פולן פארנעם פון די שאדנס צו די אינפראסטרוקטור אויף הייוועי 11, און באאמטע האבן געווארנט די איינוואוינער זיך צו רישן אויף א לענגערע צייט ביז די וועגן וועלן צוריק קענען נארמאל גענוצט ווערן. דערווייל קאנצענטרירט מען זיך צו ברענגען סטעיט און פעדעראלע הילף צו שטיצן די אפגעשניטענע קאמיוניטי ביז מען וועט קענען אנהייבן די פערמאנענטע פאריכטונגען אויף די חרוב'ע בריקן.