דער אמעריקאנער האנדלס-פארשטייער, דזשעימיסאן גריר, האט ארויסגעברענגט א שארפן קאנטראסט צווישן די באמיאונגען פון די טראמפ אדמיניסטראציע צו פאררעכטן די חסרונות פון 'גלאבאליזאציע', אין קאנטראסט צו קאנאדע וואס האלט אין איין זוכן צו פארברייטערן אירע האנדלס-אפמאכן מיט נאך לענדער.

אין זיינע קאמענטארן האט גריר אנגעוויזן אז די טראמפ אדמיניסטראציע ארבעט שווער צו פאררעכטן פראבלעמען ווי כראנישע האנדלס-דעפיציטן און דאס אריבערפירן 'מעניופעקטשערינג' (פראדוקציע) פאבריקן קיין אויסלאנד, וואס האט איבער די יארן חרוב געמאכט די אמעריקאנער אינדוסטריע און געקאסט טויזנטער דזשאבס אין סטעיטס ווי מישיגען, אהייא און פענסילוועניע. קאנאדע, פון די אנדערע זייט, גייט מיטן פארקערטן ריכטונג און זוכט צו פארמערן גלאבאלע האנדל. דאס צייגט אויף א טיפע פילאזאפישע חילוק וואס פירט צו די יעצטיגע אנגעצויגנקייט צווישן די צוויי לענדער.

לאנג-פארצויגענע געפעטן איבער ספעציפישע אינדוסטריעס

די חילוקי דעות קומען אין א צייט פון לאנג-פארצויגענע קריגערייען איבער ספעציפישע סעקטארס. קאנאדע'ס סיסטעם אויף מילכיגע פראדוקטן באגרעניצט דעם צוטריט פאר אמעריקאנער פראדוצירער, און לאקאלע פראווינצן האבן ארויפגעלייגט רעסטריקציעס וואס האלטן אמעריקאנער אלקאהאל אינדרויסן פון די געשעפטן פאליצעס אלס א נקמה שריט קעגן פריערדיגע אמעריקאנער טעריפס. ווי אויך זענען דא שארפע קריגערייען ארום די אויטאמאביל אינדוסטריע און האלץ (lumber), וואו אמעריקע טענה'ט שוין לאנג אז די קאנאדישע פראקטיקן טוען באקריוודען אמעריקאנער ארבעטער און קאמפאניס. גריר האט אנגעוויזן אז די אלע זאכן זענען א באווייז אז די האנדלס-באציאונגען דארפן ווערן איבערגעמאכט פון דאס ניי, און נישט בלויז פארברייטערט.

50-פראצענטיגע טעריפס אלס פרעשור

אלס א צענטראלע טייל פון די אדמיניסטראציע'ס סטראטעגיע, האט אמעריקע לעצטנס ארויפגעלייגט שווערע 50-פראצענטיגע טעריפס אויף א רייע קאנאדישע אימפארטן אין ווערד פון ארום 20 ביליאן דאלאר. די טעריפס, וואס רעכנט אריין געוויסע מילכיגע פראדוקטן, וויין, האקי עקוויפמענט, צעמענט און נאך, זענען אריין אין קראפט נאכדעם וואס פארהאנדלונגען צווישן די צוויי לענדער האבן נישט געברענגט קיין רעזולטאטן.

אמעריקאנער באאמטע נוצן די טעריפס אלס א מיטל צו לייגן פרעשור אויף קאנאדע צו עפענען אירע מארקעטס און נאכגעבן ביי די יעצטיגע איבערזיכט פונעם USMCA האנדלס-אפמאך. דער ציל, לויט גריר, איז איבערצומאכן די סופליי-טשעין אזוי אז מער פראדוקציע זאל זיך צוריקקערן קיין אמעריקע און באשיצן די לאקאלע אינדוסטריע.

קריטיקירער פון די קאנאדישע זייט שרייען אבער אז די שריט טוען שטערן די אינדוסטריעס און וועלן נאר הייבן די פרייזן פאר קאנסומערס און ביזנעסער אויף ביידע זייטן פונעם גרעניץ.

אן אומקלארע צוקונפט

די יעצטיגע אנגעצויגנקייט לאזט דעם צוקונפט פון האנדל אין נארט-אמעריקע אין אן אומקלארן צושטאנד, בעת די USMCA איבערזיכט גייט אן אן קיין פולשטענדיגע באנייאונג. גריר האט אנגעוויזן אז אמעריקע איז גרייט צו מאכן צייטווייליגע אפמאכן אויב א פולשטענדיגע אגרימענט קען נישט דעגרייכט ווערן. פאר קאנאדע באדייט דאס אז זיי וועלן דארפן באשליסן ווי ווייט זיי זענען גרייט צו טוישן זייערע לאנג-יעריגע פאליסיס אויף מילך, אלקאהאל, קארס און האלץ, אין אויסטויש פטור צו ווערן פון די נייע טעריפס.

דערווייל קוקן ביזנעסער פון ביידע לענדער מיט אנגסט אויף די אנטוויקלונגען, קלערנדיג אז די ווייטערדיגע רייבונגען קענען פירן צו העכערע פרייזן, צומישעניש אין די סופליי-טשעין, און ווייניגער אינוועסטמענטס.

ווי לאנג די פארהאנדלונגען זענען פארהאנקערט, גייט די אדמיניסטראציע אן מיט איר טעריף-צוגאנג אלס א געצייג צו פארזיכערן יושר'דיגע טערמינען און שטיצן לאקאלע פראדוקציע. צי די שווערע פרעשור וועט ברענגען קאנאדע צום פארהאנדלונגס-טיש אדער פירן צו א ווייטערדיגע עסקילירונג, וועט באשטימען דעם עקאנאמישן צוקונפט צווישן די צוויי שכינות'דיגע לענדער פאר די קומענדיגע יארן.