היסטארישע אפמאך אין די טעכנאלאגיע וועלט: 'ענווידיע' האלט אט אט ביים אפקויפן די עי-איי פלאטפארמע 'האגינג פעיס' פאר אסטראנאמישע 13 ביליאן דאלער

די ריזיגע טשיפ פראדוצירער קאמפאני 'ענווידיע' (Nvidia) רוקט זיך נענטער צו איינע פון די גרעסטע אפקויפן אין איר היסטאריע. לויט קראנטע באריכטן, האלט די קאמפאני ביים שליסן אן אפמאך אפצוקויפן די פאפולערע אפען-סארס (open-source) עי-איי פלאטפארמע 'האגינג פעיס' (Hugging Face) פאר ארום 13 ביליאן דאלער.

די נייעס איז צוערשט באריכטעט געווארן דורך 'ביזנעס אינסיידער' און 'די אינפארמעישאן', און איז שפעטער אויפגעכאפט געווארן דורך 'בלומבערג'. ווען מען האט געפרעגט דעם מיט-גרינדער פון האגינג פעיס, טאמעס וואלף, איבער די קלאנגען, האט ער עס נישט געוואלט דירעקט באשטעטיגן אדער אפלייקענען, נאר בלויז געזאגט אז די קאמפאני האט "אלעמאל געצויגן אינטערעסע" פון פאטענציעלע קויפערס. דאס האט נאר פארשטארקט די שפעקולאציעס אז דער דיעל האלט שוין סאך ווייטער ווי מען וויל מפרסם זיין. לויט 'די אינפארמעישאן', זענען די צוויי זייטן שוין אריבער די ערשטע פאזעס פון פארהאנדלונגען און זענען שוין געקומען צו אן אגרימענט אויף א פרייז פון ארום 12.9 ביליאן דאלער.

וואס איז 'האגינג פעיס'?

'האגינג פעיס' האט זיך אויפגעבויט א נאמען אלס די "גיטהאב (GitHub) פון עי-איי", א צענטראלע פלאטפארמע וואו דעוועלאפערס פון איבער די וועלט קענען טרעפן, ארויפלאדן און טיילן מאשין-לוירנינג מאדעלן. די קאמפאני איז געגרינדעט געווארן אין 2016 דורך קלעמענט דעלאנג, דזשוליען שאמאנד, און טאמעס וואלף. אריגינעל האבן זיי אנגעהויבן אלס א טשעטבאט עפפ, אבער אין 2018 האבן זיי זיך געטוישט צו ווערן אן אינפראסטרוקטור פלאטפארמע פאר די ברייטערע עי-איי קאמיוניטי. היינט צו טאגס האסט די פלאטפארמע מיליאנען מאדעלן און דאטא וואס ווערט טעגליך גענוצט דורך ריסערטשערס און קאמפאניס וואס בויען עי-איי פראגראמען.

פאר ענווידיע, וואס דאמינירט שוין די הארדווער (hardware) חלק פון עי-איי מיט זייערע מאכטפולע טשיפס, איז דאס א גאלדענע געלעגנהייט אריינצוטרעטן אינעם סאפטווער (software) און דעוועלאפער מארקעט, א פלאץ וואו זיי האבן ביז איצט נישט געהאט קיין שטארקע אנוועזנהייט.

אסטראנאמישע ציפערן

די פינאנציעלע ציפערן אונטער דעם מעגליכן דיעל זענען אויפפאלנד. א 13 ביליאן דאלער פרייז טעג מיינט אז די קאמפאני ווערט געשאצט אויף כמעט דריי מאל אזוי סאך ווי איר 2023 וועליוציע פון 4.5 ביליאן דאלער. באריכטן צייגן אז די יערליכע הכנסות פון האגינג פעיס האבן לעצטנס איבערגעשטיגן 150 מיליאן דאלער, וואס מיינט אז ענווידיע צאלט אן אגרעסיווע פרייז פון 86 מאל די יערליכע פארדינסטן - א קלארע צייכן פון די היינטיגע עי-איי בום.

עס איז אינטערעסאנט אנצומערקן אז ענווידיע איז שוין געווען אן אינוועסטאר אין האגינג פעיס אין 2023. לויט באריכטן האט ענווידיע פריער אנגעטראגן א קלענערע אינוועסטמענט פון 500 מיליאן דאלער לויט א 7 ביליאן דאלער וועליוציע, אבער האגינג פעיס האט עס דעמאלטס אפגעווארפן. דער יעצטיגער פרייז איז א ריזיגע שפרונג פון יענעם ערשטן אנבאט.

א סטראטעגישע שריט

אריבער די געלט, איז דאס א מאסיווע סטראטעגישע שריט פאר ענווידיע. דורכן אייגנטום פון האגינג פעיס, וועט ענווידיע באקומען א דירעקטע צוטריט צו די ריזיגע קאמיוניטי פון דעוועלאפערס. דאס קומט אין א צייט וואס אנדערע גרויסע עי-איי קאמפאניס פרובירן צו בויען זייערע אייגענע טשיפס כדי נישט צו זיין אזוי אנגעוויזן אויף ענווידיע, מאכנדיג דעם שריט אריין אין די אפען-סארס עקא-סיסטעם גאר וויכטיג פאר זייער צוקונפט.

די נייעס קומט אין די זעלבע צייט וואס ענווידיע האט ארויסגעגעבן אירע קווארטאל פארדינסטן באריכט, וואס צייגט אומגלויבליכע רעזולטאטן: די הכנסות זענען געשטיגן צו 96.2 ביליאן דאלער, א שפרונג פון 106 פראצענט פונעם פריערדיגן יאר. דאס לייגט צו נאך מער מאמענטום צו די קאמפאני וואס זיצט שוין סייווי ביים שפיץ פון די גלאבאלע עי-איי רעוואלוציע.