בס"ד

דער 26'סטער כנסת געעפנט אין ארץ ישראל אונטער א פארוואלקנטע פאליטישע צוקונפט

 

פרעמיער מיניסטער בנימין נתניהו האט זיך אנגעשלאסן מיט פרעזידענט יצחק הערצאג, סופרים קאורט פרעזידענט יצחק עמית, כנסת ספיקער אמיר אוחנה, און אנדערע פאליטישע פירער פאר די טראדיציאנעלע גרופע בילד אפצוצייכענען די אפיציעלע עפענונג פונעם 26'סטן כנסת, דעם 10'טן נאוועמבער 2026.

דאס בילד, וואס איז געכאפט געווארן אינעם כנסת געביידע אין ירושלים, האט צוזאמענגעברענגט פאליטישע פיגורן פון אלע עקן פונעם פאליטישן ספעקטרום, בעת די 120 ניי-ערוויילטע כנסת דעפוטאטן האבן אפגעגעבן זייער שבועה און אפיציעל איבערגענומען זייער אמט. דער געוועזענער מיליטערישער הויפט און איצטיגער אפאזיציע פירער גדי אייזענקאט איז אויך געווען צווישן די אנוועזנדע, שטייענדיג נעבן נתניהו ביים אנהויב פונעם נייעם טערמין.

די צערעמאניע צייכנט אפ דעם אפיציעלן אנהויב פונעם נייעם כנסת נאך די וואלן וואס זענען פארגעקומען דעם 27'סטן אקטאבער, וואס האט אינגאנצן איבערגעדרייט דעם פאליטישן וואגשאל אין לאנד. כאטש דאס בילד האט פרעזענטירט א מאמענט פון פאראייניגונג, בלייבט דאס לאנד טיף צעטיילט איבער ווער עס וועט פירן די קומענדיגע רעגירונג. דערווייל בלייבט נתניהו דינען אלס איבערגאנגס פרעמיער מיניסטער (קעירטעיקער) אינדערצייט וואס פארהאנדלונגען איבער א נייע קאאליציע גייען אן.

די וואל רעזולטאטן און קאאליציע פארהאנדלונגען:

די לעצטע וואלן האבן איבערגעלאזט נתניהו'ס ליכוד-געפירטע בלאק מיט בלויז 53 זיצן אינעם 120-זיציגן כנסת, וואס איז ווייניגער פון די 61 זיצן וואס פעלט זיך אויס פאר א מאיאריטעט. פון די אנדערע זייט האט אייזענקאט'ס אליאנץ באקומען 48 זיצן, און די אראבישע פארטייען האבן אינאיינעם געוואונען 19 זיצן.

פרעזידענט הערצאג האט געגעבן דעם מאנדאט פאר אייזענקאט צו פרובירן צוזאמשטעלן א רעגירונג. אבער דער אפאזיציע פירער שטייט אויס גאר שווערע פארהאנדלונגען מיט מעגליכע קאאליציע שותפים וועלכע זענען צעטיילט איבער עטליכע הויפט פאליטישע אישוס. אינדערצייט וואס אייזענקאט פלאגט זיך, האט נתניהו באנייט זיין רוף צו גרינדן א ברייטע נאציאנאלע יוניטי רעגירונג, טענה'נדיג אז דאס לאנד שטייט אויס ערנסטע זיכערהייט טשאלענדזשעס וואס פאדערט א פאראייניגונג פון אלע פאליטישע זייטן.

דערווייל האט די נייע אפאזיציע מאיאריטעט שוין אנגעהויבן רוקן פלענער פאר טוישונגען אינעם כנסת. דאס רעכנט אריין שריט צו טוישן דעם איצטיגן ספיקער אמיר אוחנה, ווי אויך פאראויסצורוקן געזעצן איבער די אקטאבער 7 אטאקעס און ארויפצושטעלן א לימיט אויף ווי לאנג א פרעמיער מיניסטער קען דינען.

ביז א נייע קאאליציע ווערט געפארעמט, בלייבט נתניהו אין אפיס אלס קעירטעיקער, וואס לאזט די פאליטישע צוקונפט פונעם לאנד אין דער לופטן, אפילו יעצט ווען דער ניי-ערוויילטער כנסת הייבט אן איר ארבעט.