בס"ד

שוידערליכע ווידעא צייגט דעם גענויעם מאמענט פונעם מאסיוון בערג-איינפאל אין נעפאל וואס האט אומגעברענגט איבער 500 מענטשן

נייע ווידעא רעקארדירונגען וואס זענען פארעפנטליכט און באשטעטיגט געווארן דורך די 'ניו יארק טיימס' גיבן דעם קלארסטן בליק ביז איצט אויפן גענויעם מאמענט ווען א ריזיגע טייל פונעם 'לאנגטאנג לירונג' בארג איז איינגעפאלן דעם פארגאנגענעם אוגוסט 26, וואס האט געפירט צו א קייט פון מאסיווע פארפלייצונגען וואס האבן חרוב געמאכט גאנצע שטעט און דערפער אין נעפאל און טיבעט.

אין די ווידעא קען מען הערן ווי טוריסטן רעאגירן צו א הויכע קראך וואס האט אפגעקלינגען אינעם טאל, בלויז סעקונדעס בעפאר אן אומגעהויערע מאסע פון אייז, שטיינער און ברוכווארג האט זיך אפגעריסן און אראפגעקראכט. דער איינפאל האט אויפגעריסן א ריזיגע שטויב-וואלקן וואס האט זיך שנעל פארשפרייט אינעם גאנצן ארום און פארדעקט אלעס אין די געגנט. א צווייטע ווידעא כאפט אויף די ערשטע מאמענטן נאכן איינפאל, וואו מען זעט ווי די ברוכווארג פליט אראפ דעם בארג מיט א מורא'דיגע שנעלקייט, וואס האט אנגעהויבן דעם קאטאסטראפאלן חורבן אינעם ראיאן.

סייענטיפישע אנאליזן און סאטעליט בילדער:
סייענטיסטן האבן זינט דאן באשטעטיגט אז דער ערשטער אינצידענט איז געווען א הויכע גלעטשער און פעלדזן-איינפאל, וואס האט זיך רעגיסטרירט אלס אן ערדציטערניש מיט א שטארקייט פון ארום 5.2, כאטש די אמעריקאנער געאלאגישע אגענטור האט עס לכתחילה רעקארדירט שוואכער. סאטעליט בילדער פון 'פלענעט לעבס', אינאיינעם מיט נאכפאלגנדע אנאליזן פון נעפאלעזע אויטאריטעטן און כינעזישע פארשער, האבן געהאלפן באשטעטיגן אז א גרויסע שטיק גלעטשער האט זיך אפגעריסן הויך אויפן בארג בעפארן אריינקראכן אינעם טאל אונטן.

די ריזיגע ברוכווארג האט אנגעמאכט פלוצלינגדיגע פארפלייצונגען ביי די 'לענדע קאלא' און 'באטע קאשי' טייכן, שיקנדיג ווענט פון וואסער, בלאטע און שטיינער וואס זענען אראפגעלאפן מיט א ווילדקייט אריין אין באוואוינטע געגנטער, אן קיין שום פריערדיגע ווארענונג.

א שוידערליכע צאל קרבנות:
דער מענטשליכער פרייז איז א שרעקליכער. נעפאלעזע באאמטע האבן באשטעטיגט אז די פארפלייצונגען האבן שוין אומגעברענגט איבער 500 מענטשן, בשעת ווייט איבער טויזנט זענען נאך אלץ אומגעפונען, בעת די זוכונגען גייען אן אין פולן שוואונג איבערן גאנצן אפעקטירטן ראיאן. צווישן די פארשווונדענע זענען דא א גרויסע צאל אויסלענדישע טוריסטן וואס זענען דארט געווען אויף וואקאציע, אריינגערעכנט פאמיליעס אין אמעריקע און אנדערע לענדער וואס ווארטן נאך מיט אנגסט צו הערן א גרוס פון זייערע נאנטע. איבערלעבער האבן געשילדערט ווי די פארפלייצונג וואסערן זענען אראפגעקומען פונעם בארג מיט א טעראריזירנדע שנעלקייט, צוגלייכנדיג עס צו א ריזיגע וואנט פון וואסער וואס האט זיי געטראפן אן קיין צייט צו רעאגירן.

פארשונגען און רעטונגס אפעראציעס:
אויסער די טראגעדיע זעלבסט, פארשן יעצט סייענטיסטן וואספארא ראלע די קלימאט טוישונגען האבן געשפילט אינעם דעסטאביליזירן דעם בארג. טייל פארשער ווייזן אן אויף די שמעלצונג פון אייז און לאנג-טערמין גלעטשער דעסטאביליזאציע אלס מעגליכע פאקטארן, זאגנדיג אז די ווארעמערע וועטערס אין די הויכע בערג מאכן אזעלכע איינפאלן מער מעגליך אין די סענסיטיווע הימאלייע בערג.

בעת די אויספארשונגען איבער די גענויע אורזאכן גייען נאך אן, גיט די נייע ווידעא א זעלטענעם, דירעקטן בליק ווי שנעל א לאקאלע בערג-איינפאל קען זיך פארוואנדלען אין אן אינטערנאציאנאלע הומאניטארישע קאטאסטראפע. דערווייל גייען אן די רעטונג און ערהוילונג אפעראציעס סיי אין נעפאל און סיי אין טיבעט, און די אויטאריטעטן זאגן אז עס וועט נאך נעמען א לאנגע צייט ביז מען וועט וויסן דעם פולן פארנעם פונעם חורבן.