טויטליכע אטאקע אויפ'ן וואסער: אמעריקאנער מיליטער ברענגט אום פינף פערזאן אויף א פארדעכטיגטע דראג-שיפל

דער אמעריקאנער 'סאוטערן קאמאנד' (SOUTHCOM) האט געמאלדן אז דעם 27'סטן אקטאבער האט די מיליטער'ס 'דזשוינט טעסק פארס' דורכגעפירט א טויטליכע אטאקע אויף א שנעל-פארנדיגע שיפל אינעם מזרח פאציפישן אקעאן, אומברענגענדיג אלע פינף פאסאזשירן דערויף.

לויט די מיליטער, האבן זיי געהאט קלארע שפיאנאזש אינפארמאציע וואס האט פארבינדן דאס שיפל צו דראג-שמוגלעריי, און עס איז געפארן אויף באקאנטע שמוגלעריי רוטס. די קאמאנד האט אנגערופן די פינף טויטע אלס "נארקא-טעראריסטן", א טיטל וואס די אמעריקאנער מיליטער אליינס נוצט צו באצייכענען די סארט פארברעכער. די מיליטער האט אויך ארויסגעגעבן א ווידעא וואס צייגט ווי מען צילט דאס שיפל פון דער לופטן, נאכגעפאלגט מיט א מאסיווע אויפרייס און א געדיכטע וואלקן פון רויך.

די אטאקע איז א טייל פון א ברייטערע קאמפיין וואס האט זיך אנגעהויבן אנהייב סעפטעמבער 2025, ווען די טראמפ אדמיניסטראציע האט אנגעהויבן באמבארדירן פארדעכטיגטע דראג שיפלעך אינעם קאראבישן ים און אינעם מזרח פאציפישן אקעאן. פרעזידענט דאנאלד טראמפ האט שוין עטליכע מאל קלארגעשטעלט אז אמעריקע געפינט זיך אין א פאקטישע מלחמה מיט די לאטיין-אמעריקאנער דראג קארטעלן.

לויט א ציילונג פון די 'עי-עף-פי' (AFP) נייעס אגענטור, האלט די צאל טויטע פון די סארט אטאקעס ביי נישט ווייניגער ווי 235 מענטשן.

פון די אנדערע זייט, זאגן מענטשנרעכט גרופעס און לעגאלע עקספערטן אז די פובליק האט נאכנישט געזען קיין קלארע באווייזן איבער די צילן פון די אטאקעס, און טייל ווארענען אז דאס קען זיך גרעניצן מיט אומלעגאלע מארדן אן קיין געריכטליכע פראצעדור. דאס לאזט איבער גרויסע פראגע צייכנס נאך יעדע פרישע אטאקע, אריינגערעכנט ווער עס איז פאקטיש געווען אויפ'ן שיפל, וואס די שפיאנאזש האט באמת געוויזן, און צי די קאמפיין וועט ווייטער אנגיין מיט אזא שנעלן טעמפא.