פענטאגאן גרייט זיך פאר א קריזיס: מיליטערישע באזעס וועלן דארפן קענען אנגיין זעלבסטשטענדיג פאר 90 טעג

דער פענטאגאן גרייט זיך אויף א מאסיוון פלאן צו מאכן זיכער אז די הויפט אמעריקאנער מיליטערישע באזעס איבער'ן לאנד זאלן קענען פונקציאנירן אינגאנצן זעלבסטשטענדיג פאר א מינימום פון 90 טעג, אין פאל פון א קריג אדער א נאטורליכע קאטאסטראפע וואס קען אפהאקן די ציווילע עלעקטריק, וואסער, ברענשטאף און קאמוניקאציע סיסטעמען.

דער נייער פראגראם, וואס ווערט אנגערופן "פארטרעס" (FORTRESS), איז געמאלדן געווארן דורך דעפענס סעקרעטערי פיט העגסעט דעם 30'סטן סעפטעמבער ביי א רעדע וואס ער האט געגעבן אין די 'קוואנטיקא' מארין קארפס באזע. די פלענער האבן געכאפט ברייטערע אויפמערקזאמקייט נאכדעם וואס 'פאקס ניוז' האט באריכטעט איבער אינערליכע דאקומענטן וואס רעדן ארום די פאדערונג פון די 90 טעג.

לויט העגסעט, וועט יעדע גרויסע מיליטערישע באזע דארפן פראדוצירן איר אייגענע עלעקטריק. די אפציעס נעמען אריין קליינע טראנספארטירבארע נוקלעארע רעאקטארן, גרויסע באטעריעס, און לאקאלע 'מייקרא-גרידס'. טייל פון די פלענער זענען שוין אונטערוועגנס, ווען די ארמיי פלאנירט שוין צו בויען מער ווי 20 נוקלעארע רעאקטארן אונטער א פראגראם גערופן "דזשענוס" (Janus), מיט'ן ציל אז דער ערשטער רעאקטאר זאל שוין זיין אין באנוץ ביז סעפטעמבער 2028.

די הויפט סיבה אונטער דעם פרישן פראדזשעקט איז א לאנג-יעריגע שוואכקייט וואס די מיליטער האט. א באריכט פונעם קאמערץ דעפארטמענט אין 2021 האט אנגעוויזן אז אמעריקאנער באזעס באקומען ארום 99 פראצענט פון זייער עלעקטריק פונעם אלגעמיינעם ציווילן גריד. דאס מיינט אז א סייבער-אטאקע, סאבאטאזש, אדער א לענגערע בלעקאוט קען פאראליזירן די קאמוניקאציע, לאגיסטיק און קאמאנד-צענטערן פון א באזע אינמיטן א קריזיס.

דער "פארטרעס" פלאן פאדערט אויך אז די מיליטער זאל האבן כאטש צוויי באזונדערע סופליי-רוטס פאר די וויכטיגסטע פארטיידיגונג געברויכן, כדי אויב איין פאבריק אדער סופלייער פאלט אדורך, זאל עס נישט אפשטעלן די מיליטערישע אפעראציעס.

עס איז אבער וויכטיג צו באטאנען אז די 90-טאג פאדערונג איז דערווייל נאר א ציל, און ס'מיינט נישט אז קיין איין באזע איז שוין היינט גרייט דערצו. יעדע באזע וועט האבן אן אנדערע פלאן ווי אזוי דאס צו דעגרייכן, און עס קען נעמען יארן ביז עס וועט זיין פולשטענדיג פארטיג. דער פענטאגאן האט נאך דערווייל נישט ארויסגעגעבן קיין פונקטליכע פרייז אדער א דאטום ווען די פראדזשעקט וועט זיין געענדיגט. אין די זעלבע צייט זענען עקספערטן צעטיילט צי דאס אריינברענגען נוקלעארע רעאקטארן אין די באזעס וועט טאקע העלפן די זיכערהייט, אדער עס וועט בלויז צולייגן אומנויטיגע קאסטן און ריזיקעס.