טעקסאס גאווערנאר גרעג עבאט האט געמאלדן אן עסקאלאציע אין זיין מאנאטן-לאנגע קאמפיין קעגן דאס וואס ער רופט אן "שאַריאַ געריכטן". דער גאווערנאר האט ארויסגעשיקט די 'טעקסאס דעפארטמענט אוו פאבליק סעיפטי' (DPS) אינאיינעם מיט לאקאלע דיסטריקט אטוירניס, אויסצופארשן סיי וועלכע גרופעס אדער ארגאניזאציעס וואס פרובירן אנגעבליך ארויפצוצווינגען איסלאמישע רעליגיעזע געזעצן אין די סטעיט.

"איך שיק ארויס די פאבליק סעיפטי דעפארטמענט אויסצורייסן סיי וועלכע שאַריאַ געריכטן אין די שטאט טעקסאס," האט עבאט געזאגט, צולייגנדיג א שארפע ווארענונג אז זיין אדמיניסטראציע וועט "דאס נאכגיין ביז מיר וועלן אויסרייניגן יעדע פרואוו ארויפצוצווינגען שאַריאַ געזעצן אין טעקסאס." ער האט אנגעוויזן אז די טעקסאס קאנסטיטוציע און לאקאלע געזעצן פארבאטן שאַריאַ געזעצן, וואס באדייט אז קיין שום אויסלענדישע אדער רעליגיעזע געריכט קען נישט איבערשטייגן די אמעריקאנער געריכטן אין לעגאלע סכסוכים.

די יעצטיגע שריט קומט אלס א דירעקטע פארזעצונג צו די אקציעס וואס עבאט האט אנגעהויבן אין נאוועמבער 2025. דעמאלטס האט ער געשיקט בריוו צו דיסטריקט אטוירניס, שעריפס, דעם סטעיט אטוירני דזשענעראל, און די פאבליק סעיפטי דעפארטמענט, וואו ער האט ספעציפיש אנגעוויזן אויף די "איסלאמיק טריבונאל" אין דאלאס, זאגנדיג אז זיי "פארשטעלן זיך ווי לעגאלע געריכטן" און געבן ארויס פסק'עס אונטער איסלאמישע געזעצן.

אין די זעלבע צייט האט עבאט דעזיגנירט די באקאנטע מוסולמענער ארגאניזאציע 'קעיר' (CAIR) און די 'מוסלים בראדערהוד' אלס "אויסלענדישע טעראר ארגאניזאציעס" אונטער טעקסאס געזעץ, און האט פארבאטן CAIR פון קויפן אדער פארמאגן פראפערטי אין די סטעיט. דער גאווערנאר האט אויך גענומען אויפ'ן צימבל אנדערע איסלאמישע פראיעקטן, אריינגערעכנט א געפלאנטע מוסולמענער האוזינג דעוועלאפמענט מיטן נאמען 'עפיק סיטי' (EPIC City) נעבן דאלאס, וואס סטעיט אגענטורן האבן בלאקירט פאראיאר צוליב זאונינג און ענווייראמענטאלע אישו'ס, וואס האט שפעטער געפירט דערצו אז טעקסאס געזעצגעבער זאלן דורכפירן א געזעץ צו פארבאטן רעליגיעזע דיסקרימינאציע אין ענליכע דעוועלאפמענטס.

די רעאקציע פון מוסולמענער אדוואקאטן און לעגאלע עקספערטן איז געווען גאר שארף. די 'איסלאמיק טריבונאל', וועלכע איז די הויפט ציל פון עבאט'ס אויספארשונגען, טענה'ט אז זיי זענען בלויז א וואלונטירליכע ארביטרעישאן (בוררות) סערוויס וואס באהאנדלט רעליגיעזע פראגעס ביי פאמיליע סכסוכים ווי גטין. זיי שרייבן קלאר אויף זייער וועבזייטל אז זיי זענען נישט קיין לאו-פירמע און געבן נישט ארויס קיין לעגאל-בינדנדע פסק'עס אינדרויסן פון די טעקסאס געריכט סיסטעם. א ווארטזאגער פאר די גרופע האט אנגערופן עבאט'ס ווערטער "פאקטיש און לעגאל אומריכטיג", און אים באשולדיגט אין נוצן די אישו צו "אנזייען פחד און דיסקרימינאציע קעגן מוסולמענער."

די CAIR ארגאניזאציע איז געגאנגען א שריט ווייטער און האט אריינגעגעבן א לאוסוט אין פעדעראלע געריכט קעגן גאווערנאר עבאט און אטוירני דזשענעראל קען פעקסטאן איבער די טעראר דעזיגנאציע, טענה'נדיג אז עס פארלעצט קאנסטיטוציאנאלע רעכטן. לעגאלע עקספערטן האבן אויך אנגעוויזן אז די פעדעראלע יוסטיץ דעפארטמענט האט שוין אין די פארגאנגענהייט געעפנט און פארמאכט אן ענליכע אויספארשונג קעגן א מוסולמענער קאמיוניטי אין טעקסאס אן טרעפן קיין שום אומלעגאלע אקטיוויטעטן.

דער קאנפליקט שפיגלט אפ א ברייטערע בילד וואס מען זעט ביי געוויסע רעפובליקאנער פאליטישענס איבער'ן לאנד. עקספערטן זאגן אז עס שפילט אויף לאנג-יעריגע פחדים אז איסלאמישע געזעצן וועלן איבערנעמען די אמעריקאנער יוסטיץ סיסטעם. ציווילע רעכטן גרופעס טענה'ן אז דאס קומט פון אן אומפארשטענדעניש פון וואס 'שאַריאַ' באדייט און וויאזוי רעליגיעזע בוררות ארבעט אונטער אמעריקאנער געזעץ.

פון די אנדערע זייט, זאגן עבאט'ס שטיצער אז ס'איז א לעגיטימע רעכט פון די סטעיט צו פארזיכערן אז קיין שום רעליגיעזע קערפערשאפט זאל נישט קענען ארויפצווינגען לעגאלע אויטאריטעט אויף טעקסאס איינוואוינער, און עס איז אין איינקלאנג מיט אנטי-שאַריאַ געזעצן וואס אסאך סטעיטס האבן דורכגעפירט אין די לעצטע יארצענדלינג. דערווייל, בעת די פעדעראלע לאוסוט פון CAIR גייט אן אין געריכט און עבאט גייט אן מיט זיינע פרישע אויספארשונגען, בלייבט די לעגאלע פראגע צי וואלונטירליכע רעליגיעזע בוררות איז אן אומלעגאלע פאראלעלע געריכט סיסטעם אדער א קאנסטיטוציאנאל-באשיצטע רעליגיעזע רעכט, ווייט פון געשליכטעט.