וואשינגטאן. – דער אמעריקאנער טרעזשערי סעקרעטאר סקאט בעסענט זאגט אז די אזוי-גערופענע "אפעראציע עקאנאמיק אוטקעסט" קעגן איראן איז א ריזיגע סוקסעס, יעצט ווען עס האלט שוין נאכן אנגיין פאר אכט וואכן. ער האט עס אנגערופן די שטרענגסטע קאמפיין אין די היסטאריע צו איזאלירן איין איינציגע עקאנאמיע, און ער טענה'ט אז איראן'ס זארגן זענען דראסטיש געשטיגן אין די לעצטע תקופה.

לויט בעסענט, האבן פאליטישע פירער אין טעהראן שוין אנגעהויבן זארגן איבער זייער עקאנאמיע דורכאויס דעם זומער, בעת די 'רעוואלוציאנערע גווארדיע' (IRGC) איז שוין יעצט אפן און פריוואט באזארגט, און זיי רעדן שוין איבער א מעגליכע עקאנאמישע צוזאמברוך.

די אפעראציע איז אונטערגענומען געווארן דעם 24'סטן אוגוסט אלס אן עקאנאמישע צוגאב צו די מיליטערישע און פלאטע פרעשור וואס אמעריקע לייגט אויף איראן. עס צילט דירעקט זייערע פינאנציעלע נעצן און האנדל אין סעקטארס ווי דיגיטאלע פארמעגנס, טעכנאלאגיע, גאלד, אוויאציע און שיפינג. די געדאנק אונטער דעם, ווי די אדמיניסטראציע לייגט עס אראפ, איז צו דערשטיקן די פאנדן וואס האלטן אויף דעם רעזשים און די רעוואלוציאנערע גווארדיע, אן דארפן צוקומען צו די שווערע קאסטן פון א פולע מיליטערישע קאמפיין.

עס איז וויכטיג אנצומערקן אז דאס זענען די קלעימס פון די טראמפ אדמיניסטראציע אליין, און עס איז דערווייל נישט זעלבסטשטענדיג באשטעטיגט געווארן. בעסענט זאגט אויך אז איראן האלט שוין ביים אויסלויפן פון אויסלענדישע וואלוטע, זייער אויל פראדוקציע הייבט אן צו פאלן, און אז די קומענדיגע אכט וואכן גייען זיין נאך פיל שטרענגער.

פון זייער זייט האבן איראנער באאמטע אפגעווארפן די פרעשור קאמפיין, ווען איין לאקאלע געזעצגעבער האט עס אפילו אנגערופן אן אנערקענונג פון אמעריקאנער דורכפאל אויפן מיליטערישן פראנט.

די גרויסע פראגעס יעצט זענען וויפיל שאדן די סאנקציעס מאכן באמת אינעווייניג אין איראן, צי לענדער און בענק וואס האנדלען מיט טעהראן וועלן זיך טאקע ארויסציען פון דארט, און צי דער דרוק וועט שטיפן איראן צו א דיעל אדער צו א ווייטערדיגע עסקאלאציע. בעסענט האט קלארגעשטעלט אז די ציל איז צו מאכן איראן וועלן א דיעל, אבער דערווייל איז נאכנישט דא קיין שום צייכן אז טעהראן איז גרייט דערצו.