א פראמאציע ווידעא פון א טערקישע דראון פאבריצירער מיטן נאמען "סקיידעגער" (Skydagger) האט ארויסגערופן א שטורעם אויפן אינטערנעט, נאכדעם וואס עס צייגט ווי איינע פון די פירמע'ס אויפרייס דראונס קראכט אריין און פארניכטעט א טאנק וואס זעט אויס פונקט ווי א מדינת ישראל 'מערקאווא' טאנק, באצירט מיט א בלויע פאן.

דער קורצער קליפ שטעלט אראפ דעם טאנק אלס דער "פראבלעם", און דערנאך ווייזט עס ווי דער דראון קראכט אריין דערין אלס די "לייזונג", כאטש וואס עס שטייט נישט ארויסגעשריבן קלאר אז דאס איז אן מדינת ישראל טאנק.

די פירמע סקיידעגער, וואס פראדוצירט קאמיקאזע דראונס און איז געגרינדעט געווארן אין יאר 2024, האט שוין אויפגעבויט א גרויסע ליניע פון פארשידענע אטאקע דראונס. לויט באריכטן פראדוצירן זיי טויזנטער שטיק א מאנאט, און האבן שוין עקספארטירט צענדליגער טויזנטער דראונס צו מער ווי 20 לענדער איבער דער וועלט. די פירמע מארקעט זיך אלס א ביליגע אלטערנאטיוו אין די מאדערנע דראון מלחמות, טענה'נדיג אז ביליגע סיסטעמען וואס קאסטן בלויז עטליכע טויזנט דאלאר קענען היינט צוטאגס זיין אן ערנסטע סטראשע אפילו פאר די טייערסטע און שווער-באוואפנטע מיליטערישע טאנקען.

אמעריקאנער שותפות אין שאטן פון די ווידעא

דאס ארויסשטעלן די ווידעא קומט אין א צייט וואס האט אויפגעהויבן אסאך ברעמען, צוליב דעם וואס סקיידעגער הייבט אן אריינצוטרעטן אין די מערב וועלט דעפענס מארקעט. אין יוני 2026 האט די פירמע אונטערגעשריבן אן אפמאך מיט די ריזיגע אמעריקאנער דעפענס פירמע "על-3-העריס" (L3Harris) צו פראדוצירן אינאיינעם דראונס אין אמעריקע פאר זייער 'וואמפייער' (VAMPIRE) אנטי-דראון סיסטעם. די אמעריקאנער פירמע זאגט אז די שותפות קען העלפן דעקן א פאדערונג פון ביליאנען דאלארן פאר אנטי-דראון טעכנאלאגיע אין די קומענדיגע יארן.

דער פאקט אז א פירמע וואס ארבעט אינאיינעם מיט א הויפט אמעריקאנער דעפענס קאנטראקטאר זאל ארויסשטעלן מארקעטינג מאטעריאל וואס זעט אויס צו צילן מדינת ישראל מיליטערישע געצייג, האט אנגעצינדן א פרישע דעבאטע איבער די אנגעצויגענע באציאונגען צווישן טערקיי און מדינת ישראל, וואס זענען סייווי זייער שארף צוליב די מלחמות אין עזה און סיריע.

דערווייל האבן סיי סקיידעגער און סיי די אמעריקאנער על-3-העריס נישט רעאגירט צו די פראגן פארוואס מען האט אויסגעקליבן דוקא אזא ציל פאר די ווידעא.