בס"ד

ניו זשערסי: א העליקאפטער מאכט אן עמערדזשענסי לאנדונג נאך מאטאר פראבלעמען; ביידע פאסאזשירן ארויס אומגעשעדיגט

א סייטסיאינג העליקאפטער מיט צוויי מענטשן דערין האט דינסטאג אינדערפרי, נאוועמבער 10, געמאכט אן עמערדזשענסי לאנדונג ביים 'פארט זשערסי מארין טערמינאל' אין בעיאן, ניו זשערסי, נאכדעם וואס דער פילאט האט איבערגעגעבן איבער מעגליכע מאטאר פראבלעמען און ארויסגעשיקט א 'מעידעי' רוף.

דער 'בעלל 206' העליקאפטער, אפערירט דורך די 'FlyNYON' פירמע, האט געלאנדעט אויף א גאס ארום 8:55 אינדערפרי, הארט נעבן די 'פארט ליבערטי קאנטעינער טערמינאל', לויט די לאקאלע אויטאריטעטן.

רעקארדירונגען פון די עיר טראפיק קאנטראל צייגן ווי דער פילאט מעלדט איבער א שוואכע מאטאר קראפט (RPM), און קורץ דערויף האט ער דערקלערט אז דער מאטאר האט אינגאנצן אויפגעגעבן, בעטנדיג ערלויבעניש צו לאנדן אינדרויסן פון אן עירפארט. טראץ די שרעקעדיגע עמערדזשענסי, זענען ביידע פאסאזשירן ארויס אן קיין שום וואונדן, און באאמטע האבן באריכטעט אז עס האט נישט אויסגעבראכן קיין פייער אויפן סצענע.

בילדער און ווידעאוס פונעם ארט צייגן אז די הויפט קעבין פונעם העליקאפטער איז געבליבן מער-ווייניגער גאנץ, אבער די אונטערשטע וויידל טייל איז אפגעבראכן געווארן, מיט שטיקער פונעם ראטאר צעווארפן אינעם אומגעגנט. פארט אטאריטי פאליציי, בעיאן פאליציי און אנדערע עמערדזשענסי אגענטורן זענען אראפגעקומען צום סצענע און פארזיכערט די געגנט.

דער העליקאפטער איז אידענטיפיצירט געווארן אלס א 'בעלל 206L-4' מאדעל, און ערשטע באריכטן געבן אן אז עס איז געווען א מעינטענענס פלי אלא ווי א געווענליכע סייטסיאינג טור מיט פאסאזשירן. דער העליקאפטער האט זיך געהאט געהויבן פון קוירני, ניו זשערסי, און איז געווען אויפן וועג קיין ברוקלין ווען דער פילאט האט באגעגנט דעם פראבלעם.

די פעדעראלע אוויאציע אדמיניסטראציע (FAA) און די נאציאנאלע טראנספארטאציע זיכערהייט באורד (NTSB) זענען געווארן אינפארמירט און וועלן אויספארשן די אומשטענדן ארום די עמערדזשענסי לאנדונג. דערווייל האבן באאמטע נאכנישט פעסטגעשטעלט די פונקטליכע אורזאך פונעם מאטאר פראבלעם, אדער פארוואס די וויידל פונעם העליקאפטער האט זיך אפגעריסן ביי די לאנדונג.

דער אינצידענט קומט אין א צייט וואס עס איז דא א פרישע קריטיק און איבערזיכט איבער די זיכערהייט פון סייטסיאינג העליקאפטערס, נאך א טראגישע קראך אין יאר 2025 וואס האט אריינגעצויגן אן ענליכע 'בעלל 206L-4' העליקאפטער אינעם האדסאן ריווער, וואו אלע זעקס מענטשן דערין זענען אומגעקומען. כאטש די דינסטאגדיגע לאנדונג האט זיך געענדיגט אן קיין פארוואונדעטע, וועלן אויספארשער יעצט ארבעטן צו דערגיין וואס האט געפירט צו די עמערדזשענסי און צי א מעכאנישע דורכפאל האט בייגעשטייערט צום שאדן.