דראמאטישע רעטונג אפעראציע אין פלארידע: פייערלעשער נוצן א קרעין ארויסצושלעפן א 600-פונטיגן מאן פון זיין צווייטן-שטאק דירה

פלארידע — ארטיגע פייערלעשער האבן די וואך דורכגעפירט אן אויסערגעווענליכע רעטונג אפעראציע, ווען זיי האבן גענוצט א קרעין ארויסצורעטעווען א 600-פונטיגן מאן וועלכער איז געווארן פארכאפט אין זיין צווייטן-שטאק אפארטמענט דורכאויס א מעדיצינישע עמערדזשענסי.

צוליב זיין איבערגעוויכט האט דער פאציענט בשום אופן נישט געקענט אדורכגיין די טירן אדער אראפגיין די טרעפ, וואס האט געצווינגען די רעטונגס-ארבייטער צו נעמען דראסטישע שריט. די פייערלעשער האבן געמוזט אראפשניידן א טייל פון די אפארטמענט וואנט און א טייל פונעם באלקאני צו מאכן א גענוג גרויסע עפענונג אים ארויסצונעמען.

נאכ'ן מאכן דעם לאך, האבן זיי אים פארזיכטיג באפעסטיגט אויף א ספעציעלע געפאדערטע פאלעט וואס איז געמאכט צו קענען האלטן אזא שווערע וואג. ארום א טוץ רעטונגס-ארבייטער האבן אינאיינעם קאארדינירט די קאמפליצירטע אפעראציע, און אים אראפגעלאזט מיט א קרעין ארום 20 פיס אין דער הייך, גראד צו אן אמבולאנס וואס האט אפגעווארט אונטן.

די גאנצע אפעראציע האט פארלאנגט גאר פונקטליכע קאארדינאציע צו פארזיכערן אז סיי דער פאציענט און סיי די רעטונגס-ארבייטער בלייבן אומגעשעדיגט. ווי נאר דער מאן איז אנגעקומען אראפ צום ערד, האבן די פאראמעדיקס אים תיקף איבערגענומען און אים אפגעפירט אין שפיטאל.

שכינים און ארומיגע האבן מיט שפאנונג מיטגעהאלטן ווי די פייערלעשער האבן אויפ'ן פלאץ אימפראוויזירט און געטראפן א לייזונג פאר די קאמפליצירטע סיטואציע, נאכ'ן איינזען אז די נארמאלע וועגן ארויסצוגיין זענען אוממעגליך. באאמטע האבן שפעטער אויסגעלויבט די פייער דעפארטמענט פאר זייער פראפעסיאנאליזם און ספעציעלע טרענירונג וואס האט געפירט צו א סוקסעספולע ענדע אן קיין פרישע פארוואונדעטע.