ווילדע ווידעאו: אוקראינישע דראון פאראורזאכט א קאר עקסידענט אינמיטן פליען צו איר ציל

א ווילדע אוקראינישע דראון ווידעאו צירקולירט יעצט אויפן אינטערנעט, וואס קוקט אויס ווי א סצענע פון אן אקשען פילם. אין די ווידעאו זעהט מען ווי א קאמיקאזע FPV דראון פליט גאר נידריג העכער א הייוועי אין די אקופירטע טיילן פון אוקראינע, און בשעת זי פליט אריבער, קראכן צוויי קארס אריין איינס אינעם צווייטן אויפן שאסיי.

די דראון שטעלט זיך אבער נישט אפ און פליט ווייטער אין ריכטונג פון רוסישע טרופן. אינמיטן וועג פליט זי אריבער א רוסישע אנטי-דראון גרופע וואס הייבט אן אנטלויפן אין פאניק ווען די דראון פליט אריבער גלייך איבער זייערע קעפ. שנעלע, נידריג-פליענדע דראונס ווי די זענען באקאנט צו זיין גאר שווער צו כאפן, און די קורצע קליפ צייגט פונקטליך פארוואס די זעלנער מוטשען זיך אזוי שטארק זיי אפצושטעלן אין צייט.

נאך די גאנצע כאאס, פליט די דראון ווייטער און קראכט אריין אין איר מיליטערישע ציל, פונקט ווי דער פילאט האט געפלאנט. ווי ביי רוב אזעלכע ווידעאוס, ענדיגט זיך די קליפ פונקט ביים מאמענט פונעם אויפרייס, אזוי אז עס איז אוממעגליך צו וויסן די פונקטליכע שאדן אדער אויב עס זענען דא פארוואונדעטע בלויז פון זעהן די ווידעאו. עס איז אויך נישט קלאר ווער עס איז געווען אין די קארס וואס האבן זיך צוזאמגעשטויסן, און די פונקטליכע לאקאציע, דאטום, און וועלכע מיליטערישע גרופע שטייט אונטער די אטאקע איז דערווייל נישט זעלבסטשטענדיג באשטעטיגט געווארן.

דאך שפיגלט די ווידעאו אפ וויאזוי די דראונס האבן פארוואנדלט די שאסייען ביים פראנט ליניע צו זיין פון די מערסט געפארפולע ערטער אין די מלחמה, ווען ביידע זייטן נוצן נעצן, דזשעמערס, און ספעציעלע אנטי-דראון גרופעס זיך צו באשיצן. די קליפ לאזט איבער איין גרויסע פראגע: וויאזוי קען מען אפשטעלן א דראון וואס קען אנדרייען אזא כאאס נאך בעפאר זי גרייכט בכלל איר ציל?