היץ-סענסאר גיט אים ארויס: פאליציי העליקאפטער טרעפט אנטלאפענעם ארעסטאנט באהאלטן אין א זומפ אין מישיגען

אן ארעסטאנט וואס איז אנטלאפן פונעם קראפארד קאונטי טורמע אין גרעילינג, מישיגען, איז שוין צוריק אונטער ארעסט נאך ארום צוויי און א האלב שעה, א דאנק א פאליציי העליקאפטער וואס איז יקוויפט מיט א ספעציעלע היץ-סענסאר קעמערע.

באאמטע געבן איבער אז דער ארעסטאנט, קעיסי דזשאו העלסעל, איז אנטלאפן ארום 1:30 נאכמיטאג דעם 26'סטן אקטאבער, דורכ'ן זיך ארויסשווערצן פון א דעליווערי טיר וואס איז בטעות איבערגעלאזט געווארן אפן. לויט באריכטן האט ער זיך אויסגעטון זיין טורמע יוניפארם און איז אנטלאפן בלויז מיט א ווייסע טי-שערט און קורצע הויזן. די קראפארד קאונטי שעריף אפיס האט תיכף געבעטן הילף פון די מישיגען סטעיט פאליציי (MSP), און א מאסיווע זוכונג אקציע איז אריין אין קראפט.

דער סטעיט פאליציי העליקאפטער, באקאנט אלס "טרופער 3", האט גענוצט איר פארגעשריטענע אינפרא-רעד (FLIR) קעמערע און האט אויפגעכאפט העלסעל'ס קערפער-היץ ווי ער באהאלט זיך אונטער שטיקער האלץ און שמוץ אין א זומפיגע, וואלדיגע געגנט נעבן די גרעילינג קאנטרי קלאב. די מאנשאפט אינעם העליקאפטער האט דאן אנגעוויזן פאר די פאליציי אפיצירן אויף דער ערד פונקטליך וואו ער געפינט זיך, און מען האט אים ארעסטירט אן קיין שום אינצידענטן אדער פארוואונדעטע.

אין די זוכונגען זענען געווען פארמישט עטליכע פאליציי אפטיילונגען, אריינגערעכנט די עוויעישאן יוניט, קעי-ניין (הינט) יוניט, עמערדזשענסי סופארט טיעם, דעטעקטיווס פון די האוטאן לעיק, געילארד, און טראווערס סיטי פאסטן, ווי אויך די ספעציעלע פוג'יטיוו טיעם. די סטעיט פאליציי האט אויסגעלויבט אלע אגענטורן פארן ארבעטן אינאיינעם צו ענדיגן די מאסיווע אקציע אזוי שנעל און סעיף.

עס בלייבט דערווייל אומקלאר ווי אזוי די טיר איז געבליבן אפן, און וועלכע פרישע קלאגעס דער ארעסטאנט וועט יעצט באקומען פארן פרובירן צו אנטלויפן.