ווייס פרעזידענט דזשעי. די. ווענס שלאגט אלארם איבער אן ערנסטע פראבלעם וואס פלאגט די רעפובליקאנער פארטיי אויף די אינטערנעט און סטראשעט זייערע שאנסן אין די קומענדיגע מידטוירם וואלן. ווענס רופט עס אן "בלעקפילינג" — א כוואליע פון שווארצזעערישע פעסימיזם און יאוש וואס פארשפרייט זיך אויף סאשעל מידיא צווישן קאנסערוואטיווע וויילער.

אין א פרישע אינטערוויו האט ווענס אנגעוויזן אז די דאזיגע נעגאטיוויטעט ווערט אנגעפירט דורך פראסטראציע איבער די עקאנאמיע, אויסערן פאליטיק, און אנדערע שוועריגקייטן אין די טראמפ אדמיניסטראציע. ער ווארנט אז דאס קען שטילערהייט איבערצייגן אנטוישטע רעפובליקאנער פשוט צו בלייבן אינדערהיים קומענדיגן נאוועמבער און נישט ארויסקומען שטימען.

אנשטאט אוועקצומאכן די פראסטראציע, האט ווענס עס אדרבה אנערקענט, זאגנדיג אז עס איז טאקע דא נאך אסאך ארבעט צו טון. אבער ער האט קלארגעשטעלט אז אויפגעבן אויף פאליטיק איז די גענוי פארקערטע רעאקציע פון וואס מען דארף טון. זיין מעסידזש איז געווען גאר קלאר: בלייבט אריינגעטון, קעמפט ווייטער, און לאזט נישט די אינטערנעט יאוש אייך אפרעדן פון ארויסקומען וואויטן.

די קאמענטארן זענען א טייל פון ווענס'ס ברייטערע סטראטעגיע פאר די מידטוירם וואלן, וואס איז געבויט אויף דעם צו אנערקענען די אנטוישונג פון די וויילער אבער אן אויפגעבן דעם קאמף. ער האט שוין עטליכע מאל איבערגעחזר'ט פאר וויילער אז אויפגעבן יעצט וועט בלויז צוריקגעבן די מאכט פאר די דעמאקראטן, און ער לייגט אראפ דאס ארויסקומען שטימען אלס די איינציגסטע וועג צו באשיצן די שמאלע רעפובליקאנער מאיאריטעט אין קאנגרעס.

די מעסידזש קומט פון א נויטווענדיגקייט, וויבאלד די רעפובליקאנער גרייטן זיך פאר די שווערע ווינטן וואס קלאפן געווענליך די פארטיי וואס זיצט אינעם ווייסן הויז דורכאויס א מידטוירם סעזאן. צו דעם קומט נאך צו אז ווענס'ס אייגענע פאולס און פאפולאריטעט נומערן מאכן נישט די ארבעט גרינגער. דורכן אדרעסירן די פראבלעם דירעקט, בעט ער בעצם זיין אייגענע באזע זיך אויפצוכאפן פונעם יאוש, טענה'נדיג אז די אנליין ציניזם איז א פיל גרעסערע געפאר פאר די רעפובליקאנער יעצט ווי סיי וואס די דעמאקראטן טוען.