צייכענונגען אויפ'ן זאמד: א מאסיווע דענקמאל אויף די טעל אביב ביטש אפצוצייכענען 3 יאר זינט די בלוטיגע שמחת תורה אטאקעס

אויף די ברעגעס פון די טעל אביב ביטש זענען אויסגעלייגט געווארן טויזנטער צייכענונגען אין פארעם פון מענטשליכע קערפערס, אלס א טייל פון א מאסיווע און הארצרייסנדע דענקמאל אפצוצייכענען דריי יאר זינט די שוידערליכע אקטאבער 7 (שמחת תורה) אטאקעס.

די גרויסע אויסשטעלונג איז אויסגעפארעמט געווארן אין לאנגע, גראדע רייעס אויפ'ן זאמד, סימבאליזירנדיג די ארום 1,200 אידן הי"ד וואס זענען אומגעקומען יענעם ביטערן טאג, ווען כאמאס טעראריסטן האבן אינפילטרירט די דרום קהילות, די נאווע מוזיק פעסטיוואל, און מיליטערישע באזעס. די בילדער פונעם ביטש ביים זונאונטערגאנג, מיט די שטאטישע געביידעס אין די בעקגראונד, האבן געשאפן א טרויעריגע און שוידערליכע בילד פון דעם גרויסן פארלוסט, וואס האט צוגעצויגן הונדערטער באזוכער וועלכע זענען ארומגעגאנגען צווישן די פיגורן אין א שטילע טרויער.

די ארגאניזירער האבן ארויסגעברענגט אז די סצענע דינט אלס א ווייטאגליכע דערמאנונג פון די פילע פאמיליעס וואס זענען אויסגעשאכטן געווארן אין זייערע היימען, די אומשולדיגע באטייליגטע ביים פעסטיוואל, און די זיכערהייט קרעפטן וואס זענען געפאלן ביים פארטיידיגן אנדערע. אין די קעפשענס פון די ווידעאוס וואס זענען ארומגעפארן, ווערט דער טאג באצייכנט אלס דער ארגסטער פאגראם אין די היסטאריע פון מדינת ישראל, דורכגעפירט דורך ראדיקאלע איסלאמישע טעראריסטן וועלכע האבן דעמאלטס אויך פארכאפט 251 משכונות.

דער דענקמאל איז געווען א טייל פון א ברייטערע טרויער-טאג איבער'ן לאנד, וואס האט אריינגענומען מאמענטן פון שטילקייט, צערעמאניעס ביים ארט פונעם פעסטיוואל, פראטעסטן, און א נאציאנאלע פארזאמלונג אין די ירקון פארק אין טעל אביב. דראון-ווידעאוס האבן ארויסגעברענגט דעם ריזיגן פארנעם פונעם אויסשטעל, צייגנדיג ווי די טויזנטער פיגורן ציען זיך ווייט אויס אויפ'ן ברעג ים בעת די זון גייט אונטער.

פאר פילע האט דאס געדינט אלס א שטארקע פיזישע אילוסטראציע פונעם מענטשליכן פרייז וואס באגלייט נאך אלס דעם פאלק דריי יאר שפעטער. באזוכער האבן איבערגעלאזט צעטלעך, בלומען, און פערזענליכע תפילות צווישן די פיגורן, אינזינען האבנדיג סיי די אומגעקומענע און סיי די משכונות. אויף א ביטש וואס ווערט געווענליך באנוצט פאר פארוויילונג, האבן די רייעס פון ליידיגע פיגורן פארוואנדלט דעם זאמד אין א צייטווייליגן בית החיים פון טרויער און זכרון.