איז דאס א מיסיל אדער א פליגער? נאסא'ס מאדנע 'עקס-59' סופערסאניק דזשעט כאפט די אויפמערקזאמקייט פון אמעריקאנער בירגער

א ווידעא ווי א שפיציגע, נאדל-ארטיגע פליגער פארט אריבער די אמעריקאנער הימלען האט איבערגעלאזט אסאך מענטשן מיט די זעלבע פראגע: איז דאס א מיסיל? אבער די ענטפער איז ניין. דאס איז נאסא'ס "עקס-59 קוועסט" (X-59 QueSST), אן עקספערימענטאלע סופערסאניק דזשעט מיט א גאר לאנגע נאז און אן עקסטרעם-שמאלע קערפער.

דער פליגער איז אפגעכאפט געווארן אויף ווידעא דורכאויס איר ערשטע קראס-קאנטרי רייזע פון קאליפארניע צום קענעדי ספעיס צענטער אין פלארידע. נאסא פילאטן פליען די רייזע באגלייט מיט עף-15 און עף/עי-18 פליגערס ביי די זייט. די יעצטיגע רייזע פאלט אויס פונקט צום ערשטן יארטאג פון איר ערשטע פלי רייזע וואס איז פארגעקומען אום אקטאבער 28, 2025. דער עקס-59 איז אויפן וועג צו ווערן אויסגעשטעלט ביי נאסא'ס "מעקס פאוער" (MAX POWER) עיר-שאו אינעם קענעדי ספעיס צענטער קומענדיגן נאוועמבער 7-8, וואו פילע מענטשן וועלן קענען באקומען א נאנטן בליק אויף דעם מאדנעם פליגער וואס האט אנגעמאכט אזוי פיל צומישעניש.

די מאדנע פארעם פונעם פליגער איז אבער נישט סתם אזוי, נאר דאס איז די גאנצע ציל פונעם פראדזשעקט. די נאז פונעם פליגער איז אזוי לאנג אז עס איז בכלל נישט דא קיין פראנט-פענסטער פארן פילאט ארויסצוקוקן. אנשטאט דעם, זעט דער פילאט וואס טוט זיך אינדרויסן דורך עקסטערנע קעמערעס און א סקרין, א סיסטעם וואס נאסא רופט די "עקסטערנעל וויזשען סיסטעם".

אין איר ערשטע יאר האט דער דזשעט שוין דורכגעמאכט 40 טעסט-פלי רייזעס, און האט דעגרייכט א ספיד פון מאך 1.53 און א הייך פון 56,000 פיס. זי האט צום ערשטן מאל דורכגעבראכן דעם סאונד-בעריער דעם פארגאנגענעם יוני ביי א ספיד פון ארום מאך 1.1.

דאס אלעס איז א טייל פון נאסא'ס "קוועסט" מיסיע, וואס האט א ציל צו אויפווייזן אז א סופערסאניק פליגער קען פליען העכער די ספיד פון קול און ארויסגעבן בלויז א מילדע קלאפ אנשטאט די מעכטיגע "סאניק בום" אויפרייס וואס טרייסלט געווענליך די פענסטערס. אויב דער עקספערימענט וועט זיך אויסארבעטן, קען דאס עפענען די טיר פאר קאמערציאלע סופערסאניק פלי רייזעס איבער יבשה, וואס איז דערווייל אומלעגאל צוליב די הויכע גערודער. די גרויסע פראגע וואס בלייבט אבער דערווייל אומגעענטפערט איז, ווי אזוי מענטשן אויף דער ערד וועלן באמת רעאגירן צו דעם קלאפ.