בס"ד

ריזיגע פייערן און שווערע רויך ביי סאודי אראביע'ס גרעסטע אויל פעלדער נאך אטאקע דורך די חוטי רעבעלן

שווערע פלאמען און געדיכטע רויך זענען געזען געווארן הייבן זיך פון די 'סאודי אראמקא' אויל פאסיליטיס אין כורייס, נאך אן אנגעבליכע אטאקע וואס די חוטי רעבעלן פון תימן האבן גענומען פאראנטווארטליכקייט דערויף.

די כורייס קאמפלעקס, וואס געפינט זיך דרום-מזרח פון די הויפטשטאט ריאד, איז פון די גרעסטע אויל פעלדער אין סאודי אראביע און האט א פראדוקציע קאפאציטעט פון ארום 1.5 מיליאן פאסן רויע אויל א טאג. דער מיליטערישער ווארטזאגער פון די חוטים, יאחיא סארי, האט געמאלדן אז די גרופע האט געצילט אראמקא לאקאציעס סיי אין ריאד און סיי אין כורייס מיט באליסטישע מיסילס און דראונס, און ער האט באטאנט אז די אפעראציעס האבן פאראורזאכט ריזיגע פייערן.

סאטעליט בילדער וואס זענען געכאפט געווארן אין די טעג נאך די אטאקע צייגן קלאר ווי רויך הייבט זיך פונעם פאסיליטי און פארשפרייט זיך איבער די געגנט. בילדער און ווידעאוס פונעם רויך זענען ברייט צושפרייט געווארן, כאטש וואס אפיציעלע באשטעטיגונג פון סאודי אראביע איבער די פונקטליכע שאדן איז דערווייל זייער באגרעניצט.

די כורייס פעלד שפילט א צענטראלע ראלע אין די סאודישע אויל פראדוקציע און געפינט זיך נעבן וויכטיגע אינפראסטרוקטור וואס נעמט אריין טיילן פון די 'איסט-וועסט' פייפליין. פריערדיגע גרויסע אטאקעס אויפן פעלד, בפרט אין יאר 2019, האבן צייטווייליג געשטערט די גלאבאלע אויל מארקעטס און ארויסגעברענגט איר סטראטעגישע וויכטיגקייט.

די יעצטיגע באריכטן קומען אין א צייט פון אן עסקאלאציע אין די אטאקעס צווישן ביידע זייטן, ווען די חוטים פארמערן זייערע אטאקעס אויף סאודישע ענערגיע און מיליטערישע צילן, און די סאודי-געפירטע קאאליציע ענטפערט מיט אפעראציעס אינעם לאנד תימן.

ענערגיע אנאליסטן האלטן א נאנטן אויג צו זען אויב עס וועט זיין סיי וואספארא באשטעטיגטע אימפאקט אויף די אויל עקספארט פונעם פלאץ. צו דער רויך קומט פון א דירעקטע קראך אויף די פראסעסינג יוניטס אדער איז עס א קלענערע אינצידענט, ברענגט די פאסירונג נאכאמאל ארויס די שוואכקייט פון די קריטישע גאלף אויל אינפראסטרוקטור קעגן ווייט-גרייכנדע דראון און מיסיל אטאקעס. די סיטואציע האלט זיך ווייטער אינמיטן אנטוויקלען בעת ביידע זייטן טוישן זיך מיט סטעיטמענטס און סאטעליט דאטא ווערט ווייטער אנאליזירט.