כי הנה הקהלות נעדו יחדיו! היסטארישער אסיפה פארגעקומען נעכטן דורך די רבנים ודיינים פון די גרעסטע קהלות קדושות איבער ניו יארק, אינערהאלב דעם פאראייניגטער "ועד הקהלות"

וואס גיט זיך אפ מיט ברענגען געזיגלטע און פארזיכערטע טעכנאלאגיע פאר'ן היימישן ציבור, צו פארזיכערן דאס אנהאלטן דעם סטאנדארט פון א בעיסיק סעלפאון, צוגעשטעלט היימיש פון אלע סארטן, אפגעהיטן פון יעדן מכשול.

די קהילות הקודש חברי ועד הקהלות וועלכע פארמירן א שטאנדהאפטע אייזן-שטארקע באזע וועלכע פארמירט א הערליכער סטאנדארט און איז גורם אזא מעכטיגער סופליי באזע פון כלים מאושרים פאר גאנץ ניו יארק רבתי און פאר יהדות ארה"ב, זענען: סאטמאר, סאטמאר, סקווירא, וויזשניץ מאנסי, באבוב-45, ראחמיסטריווקא.

דער היינטיגער אסיפה איז געווען די 3'טע אין די רייע במשך די לעצטע 2.5 יאר, וואס מזמן לזמן ווען עס קומען אן גרעסערע שאלות זעצט מען זיך צוזאם אינאיינעם צו באשליסן את המעשה אשר יעשון, אבער ספעציעל איז דאס יעצט שטארק געווען געווידמעט אויף די נושא פון AI אויף סעלפאונס, דורכצוטון דעם מציאות פון טעלעפאן קאלס און טעקסט מעסעדזשינג מיט נומערן וואס גיבן אויטאמאטישע ענטפערס אויף אלע סארט שאלות, א שטארקע פראבלעם וואס האט אנגעהויבן פלאגן היימישע שטובער מער און מער, און נאך לאנגע חדשים ארבעט איז דער ועד הקהלות ב"ה אנגעקומען צו א מהלך פון קענען בלאקירן די אלע נומערן אויף יעדע פאון דורכ'ן פאון פירמע.

די אסיפה איז פארגעקומען אין א צענטער אין ניו דזשערסי, זייענדיג א צענטער-פונקט צווישן ברוקלין און אפסעיט, פון וואו די רבני הקהלות זענען זיך צוזאמגעקומען.

עיני העדה!

דאסמאל האבן די ראשי העדה די אדמורי"ם שליט"א, עיני העדה, אראפגעשיקט אלס פערזענליכע שליח צום אסיפה זייערע קינדער, בנים על אבותם, צו זיין א שליח אויפ'ן פלאץ און מיטהאלטן די דיונים אינאיינעם מיט די טעכנאלאגיע-רבנים און טעכנאלאגיע-עסקנים פון יעדע קהלה, און מחזק זיין דעם היסטארישן אינטערנעמונג וואס האט געברענגט א רעוואלוציע אין די היימישע גאס און ברעכט ווייטער מויערן צו ברענגען א גלענצענדע עתיד פון אידישע כלים טהורים, אייגענע כלים פאר די אייגענע מארקעט, באהיטן פון מכשולות בס"ד.

עס האבן זיך אנגעזען די בני האדמורי"ם פון ניו יארק ווי פאלגנד: הגה"צ רבי מנחם מענדל טייטלבוים שליט"א בן כ"ק אדמו"ר מסאטמאר שליט"א; הגה"צ רבי חיים צבי טייטלבוים שליט"א בן כ"ק אדמו"ר מסאטמאר שליט"א; הגה"צ רבי אהרן מענדל טווערסקי שליט"א בן כ"ק אדמו"ר מסקווירא שליט"א; הגה"צ רבי יוסף אונגאר שליט"א בן כ"ק אדמו"ר מבאבוב-45 שליט"א; הגה"צ רבי מאיר יוסף רובין שליט"א חדב"ן כ"ק אדמו"ר מראחמיסטריווקא שליט"א, הגה"צ רבי יעקב יוסף האגער שליט"א בן כ"ק אדמו"ר מ'וויזשניץ מאנסי שליט"א, הגה"צ רבי חיים מאיר האגער שליט"א בן כ"ק אדמו"ר מ'וויזשניץ וומסב"ג שליט"א, הגה"צ רבי נפתלי האגער שליט"א בן כ"ק אדמו"ר מ'וויזשניץ ב"פ שליט"א.

כח הרבים! א ניו יארק'ע רעוואלוציע פון אחדות פאר אידישקייט.