הונדערטער תלמידי ישיבת פאנאוועזש ביי אן עצרת תפילה ביים קבר פונעם פאנאוועזשער רב זצ"ל

אין א שפעטע נאכט שעה האבן זיך הונדערטער תלמידים פון ישיבת פאנאוועזש פארזאמלט ביים קבר פונעם גרינדער פון די ישיבה, דער פאנאוועזשער רב, הגאון ר' יוסף שלמה כהנמן זצ"ל, אויפ'ן פאנאוועזשער בית החיים אין בני ברק, פאר א גרויסע עצרת תפילה און זעקה אין ליכט פון די אומקלארקייט ארום די צוקונפט פון זייער ישיבה.

די תלמידים, וועלכע ציילן זיך צו די פראקציע אונטער די פירערשאפט פון הגאון ר' שמואל מארקאוויטש שליט"א, זענען ארויסגעקומען אין די מאסן נאך באריכטן אז א גרויסע ציבור ווערט ערווארטעט זיך צו משתתף זיין ביים מעמד.

די עצרת תפילה קומט אין א גאר סענסיטיווע צייט פאר די ישיבה, נאך די לעצטיגע אנטוויקלונגען אין די צענדליגער יארן לאנגע מחלוקת אינעם ישיבה. פאריגן חודש האט די תל אביב'ער דיסטריקט געריכט אפגעווארפן אן אפיל צו בטל מאכן א פסק בוררות איבער די פאנאוועזשער קעמפוס. די באשלוס האט גאר שווערע קאנסעקווענצן פאר די תלמידים פון ר' שמואל מארקאוויטש.

לויט דעם פסק בוררות דארף די גרופע פארלאזן דעם היסטארישן פאנאוועזשער קעמפוס, און עס ווערט זיי אויך פארבאטן צו ווייטער נוצן דעם נאמען "פאנאוועזש".

מיט דעם שווערן בילד אין אונטערגרונט, האבן די תלמידים זיך געוואנדן מיט הייסע תפילות ביים ציון פונעם פאנאוועזשער רב זצ"ל, וועלכער האט איבערגעבויט די ישיבה אין בני ברק נאכן ביטערן חורבן אייראפע.

ווידעא קליפס פונעם ארט צייגן א ריזיגע ציבור וואס שטייט געדרענגט ארום דעם קבר אין די שפעטע נאכט שעה'ן, און רייסן איין מיט בכיות. די פארזאמלטע האבן צווישן אנדערע געזאגט "אבינו מלכנו" מיט גרויס התעוררות, און מתפלל געווען אז די שווערע מצב זאל זיך לייזן און די ישיבה זאל קענען אנגיין ווייטער אומגעשטערט.