בס"ד

א גאר שיינע באזוך איז פארגעקומען ביי כ"ק אדמו"ר מסאטמאר שליט"א וועלעכע וויילט די טעג אין פאלם ספרינגס וואס איז פיר אהאלב שעה צו פארן פון דעם הערליכע בליענדע יישוב קאסא גראנדע אריזאנע.

דעם זונטאג 4:30 פארטאגס האט זיך ארויסגעלאזט די שיירא פון קאסא גראנדע מיטן ציל צו דאווענען שחרית אינאיינעם מיטן רבי'ן שליט"א אין פאלם ספרינגס

עס זענען מיטגעקומען דער מרא דאתרא דינוב'ע רבי שליט"א, הרב חיים שלמה בערגער אבד"ק קהל חסידים מיט בנו הרב יצחק אייזיק בערגער דומ"ץ קהל חסידים, אויך איז מיטגעקומען הרה"ג רבי יעקב ווייס שליט"א רב דקהל ישמח משה דסאטמאר - מאנסי וועלעכע האט געוויילט דעם שבת אויף אפרו און באקומען חשק צו מיטקומען ביים באזוך, דער מייסד הרב יהושע רובין, דער מלמד און העסקן ר' משה סורקיס. אויך זענען מיטגעקומען עטליכע מחסידי סאטמאר וועלעכע וואוינען אין קאסא גראנדע.

עקסטער האט זיך אנגעזען די באטייליגונג פון די ילדי חמ"ד וואס זענען מיטגעפארן, רוב קינדער פון די עלטערע כיתה פון תלמוד תורה כנסת יהושע דקאסא גראנדע זענען אויפגעשטאנען גאר פרי צו קענען זוכה זיין מיטצוהאלטן די היסטארישע נסיעה.

מען איז טאקע אנגעקומען בשעה טובה ומוצלחת פארן דאווענען, און ווען די רבי שליט"א איז אריינגעקומען אין ביהמ"ד און באמערקט ידידו הרב חיים שלמה בערגער אבד"ק קהל חסידים האט ער זיך זייער געפריידט לקראתו און אים שיין באגריסט און געכאפט א קורצע שמועס אן געבן שלום פארן דאווענען.

דאן איז הרב רבי יעקב ווייס שליט"א רב דקהל ישמח משה דסאטמאר מאנסי צוגעגאנגן צום רבין פארשטעלן אז ער איז געקומען אין באגלייטונג פון די קינדער פון די עלטערע כיתה פון די קאסא גראנדע חיידר.

די קינדער האבן געדאווענט מיטן רבי'נס מנין, מען האט לכבודם אויסגעשטעלט עקסטערע טישן ממזרח למערב אז זיי זאלן בעסער קענען זען דאס דאווענען פון רבין.

נאכן דאווענען האט די רבי אויפגענומען דעם קהל חסידים רב הרב חיים שלמה בערגער ובנו דער דיין שליט"א און ווארעם געשמועסט פאר א לענגערע צייט. דערנאך איז צוגעגאנגן דער מרא דאתרא פון קאסא גראנדע דינוב'ע רבי נעמען שלום פון רבין.

נאכן שלום נעמען האט זיך די רבי אוועקגעזעצט צו א ספעציעלער מעמד קבלת פנים און לחיים פאר די חשובע קאסא גראנדע געסט, צום מעמד האט מען אויסגעשטעלט די טישן אז די קינדער זאלן קענען זיצן קעגן דעם רבין ביים מעמד.

מען האט געהאפט אז די רבי וועט פארהערן די קינדער, אבער למעשה האט דער רבי אנשטאט געגעבן א הערליכע דרשה פאר די קינדער און פאר די איבעריגע תושבי קאסא גראנדע, אויסרופענדיג גאר חידוש'דיגע ווערטער ארויסצייגענדיג גאר שטארקע שטיצע פארן נייע בליענדע ישוב און איר מייסד הרב יהושע רובין אויסרופענדיג אז די קהלה האט ערליכע רבנים.

איך וועל דא אראפברענגן עטליכע אויסצוגן פונעם שמועס פון רבין: דער רבי האט ארומגעשמועסט די מימרא פון הרה"ק מצאנז זי"ע וואס האט אויסגערעכענט ווי די תורה איז געווען און דארף נאך אלץ אנקומען אין גלות אויסרעכענדיג אז די תורה דארף נאך אנקומען קיין אמעריקא האט דער רבי אויסגעשמועסט "א ישוב אין אריזאנע, זעט אויס אז יעדע זאך פעלט זיך אויס עס" דער רבי האט ממשיך געווען "עס איז דא א ערליכע ישוב, א אפגעהיטענע ישוב, אזוי ווי ביי אונז אינדערהיים, חשובע רבנים און מורי הוראות מיט חשובע מלמדים און חשובע קינדער, קינדער וואס יראת ה' חורפות על פניהם ריינע ערליכע, איך האב מיר דאס קיינמאל נישט פארגעשטעלט, איך האב מיר אמאל געקענט פארשטעלן אז עס וועלן זיין אין אריזאנע ערליכע קינדער מיט פיאות?, אין אריזאנע זעהט מען אידישע קינדער חסידישע קינדער א געוואלדיגע חידוש! די רצון ה' איז עס זאל זיין איבעראל אידן, מען איז אין גלות, איבעראל דארף מען מלקט זיין די ניצוצות, אונז ווייסן נישט פארוואס אבער דא און דארט וועלן זיין ערליכע אידן. איך ווינטש אן די אלע יודן זאלן האבן הצלחה און סיעתא דשמיא, דער אייבערשטער זאל העלפן עס זאל וואקסן, ס'זאל וואקסן בכמות און וואקסן באיכות! דערנאך האט די רבי ארויסגעברענגט אז היות עס איז דא ווייניג אידן אין קאסא גראנדע דערפאר איז יעדער איד אין קאסא גראנדע מער חשוב פון די מקומות ווי עס זענען דא אסאך אידן ווייל עס איז מער א יקר המציאות."

צום שלוס האט דער רבי האט דערנאך שיין אנגעווינטשן די קינדער און אויך פאר די עסקנים וואס זענען עוסק ברוחניות ובגשמיות צו מצליח זיין, דער רבי האט צוגעלייגט אז ווען משיח וועט קומען, אפילו די זייגער איז געריקט אין אריזאנע פון ניו יארק, דאך וועט ער צאמנעמען יעדעם אינאיינעם די זעלבע צייט.

נאכן דרשה האט דער רבי געווינטשן לחיים פארן מרא דאתרא דינוב'ע רבי און דער רב הרב חיים שלמה בערגער, פארן מייסד היישוב הרב יהושע רובין דערנאך פאר די איבעריגע משתתפים, דערנאך זענען די קינדער און די מלמדים אריבער נעמען שלום און ווינטשן לחיים פון רבין.

זאל דער באשעפער אננעמען די ברכות קודש און קאסא גראנדע זאל ווייטער בליען בכמות ובאיכות ברוחניות ובגשמיות