מיטוואך אינדערפרי האט א חשוב'ע משלחת פון גדולי ראשי ישיבות און באקאנטע עסקנים פון אמעריקע אפגעשטאט א ספעציעלן באזוך אין די 'לב לאחים' ישיבה אין שטאט קדימה, ארץ ישראל. דער ציל פונעם באזוך איז געווען מיטצוהאלטן פון דער נאנט און ארויסווייזן שטיצע פאר די ברייט-פארצווייגטע תורה און קירוב אקטיוויטעטן וואס די ארגאניזאציע פירט אן איבער גאנץ ארץ ישראל.

בראש פון די משלחת זענען געשטאנען די חשוב'ע ראשי ישיבות, הגאון ר' אליהו ברודני שליט"א, ראש ישיבת מיר, אינאיינעם מיט הגאון ר' יעקב בענדער שליט"א, ראש ישיבת דרכי תורה, הגאון ר' אבא ברודני שליט"א, און הגאון ר' אלי' הערצקא שליט"א.

די רבנים זענען באגלייט געווארן דורך א שיינע צאל פראמינענטע עסקנים און נגידים פון לעיקוואוד, אריינגערעכנט ר' שלום שטיין הי"ו און ר' פנחס באק הי"ו, וועלכע זענען געקומען מקדיש זיין פון זייער צייט צו שטיצן די הייליגע ארבעט.

דורכאויס דעם באזוך האבן די ראשי ישיבות ארומגעקוקט אינעם לאקאלן צענטער און מיטגעהאלטן די טעגליכע סדרי הלימוד. זיי האבן זיך אפגעשטעלט שמועסן מיט די תלמידים, און האבן איבערגעגעבן ווארימע דברי חיזוק און הדרכה פאר די ארטיגע רבנים, מגידי שיעור און כלי קודש, זיי צו מוטיגן ווייטער אנצוגיין מיט זייער הייליגע עבודת הקודש און צוריקברענגען אידישע קינדער לאביהם שבשמים.