מדינת ישראל דעפענס ריז 'אלביט' ציט אויפמערקזאמקייט ביי מאראקא 'עיר שאו' מיט פארגעשריטענע מיסיל סיסטעמען

די מדינת ישראל דעפענס פירמע 'אלביט סיסטעמס' ציט יעצט שטארקע אויפמערקזאמקייט ביים מאראקעש 'עיר שאו', וואו זיי האבן צום ערשטן מאל ארויסגעשטעלט זייער פארגעשריטענע 'PULS' ראקעטן סיסטעם פאר מיליטערישע קויפער פון איבער די גאנצע וועלט. די מאדערנע סיסטעם קען ארויסשיסן פארשידענע סארטן געצילטע ראקעטן און מיסילס, מיט טייל פון זיי וואס קענען גרייכן צילן ביז 300 קילאמעטער ווייט, וואס מאכט עס פאר איינע פון די מערסט פארגעשריטענע און פילזייטיגע וואפנס אויפן מארקעט היינט צוטאגס.

דאס איז די ערשטע מאל וואס 'אלביט' באטייליגט זיך ביי די מאראקא אויסשטעלונג, וואס קומט פאר פון אקטאבער 7 ביזן 10'טן אויף א באזע פון די מאראקאנער לופט-פלאטע. די פירמע האט זיך נישט צוריקגעהאלטן און האט אויך מיטגעברענגט אהין זייער באקאנטע 'הערמעס 900' דראון און א רייע אנדערע אטאנאמישע פלאטפארמעס.

די אויסשטעלונג קומט אין א צייט וואס די מיליטערישע פארבינדונגען צווישן מדינת ישראל און מאראקא ווערן אלס שטערקער. די מאראקאנער רעגירונג אין ראבאט האט שוין אין די פארגאנגענהייט איינגעקויפט וואפנס פון 'אלביט', אריינגערעכנט האוויצערס און געצילטע ראקעטן. לעצטנס איז באריכטעט געווארן אין מדינת ישראל איבער א 150 מיליאן דאלאר קאנטראקט צו פארקויפן די PULS סיסטעם פאר אן אומבאקאנטע קליענט, וואס האט געפירט צו שפעקולאציעס אז מאראקא אליינס איז מעגליך דער קויפער, כאטש קיין איין זייט האט עס דערווייל נישט אפיציעל באשטעטיגט.

די היי-יעריגע מאראקעש עיר שאו האט צוגעצויגן קרוב צו 200 אויסשטעלער פון 27 לענדער, וואס אונטערשטרייכט מאראקא'ס וואקסנדע אמביציעס זיך צו פארוואנדלען פון א לאנד וואס קויפט וואפנס צו א לאנד וואס פראדוצירט וואפנס. די אנוועזנהייט פון 'אלביט' צייגט ווי ווייט די מדינת ישראל דעפענס פירמעס זענען גרייט צו גיין צו באקומען א פעסטע פיס-טריט אינעם וואקסנדן צפון-אפריקאנער מארקעט.