*היסטארישע דורכברוך אין ראם פון ׳נאך גוטע בשורות׳ פאר כלל ישראל: פרעזידענט טראמפ יר״ה שרייבט אונטער עקזעקיטיוון ארדער צו ערמעגליכן פאר אינשורענס פירמעס צו דעקן פראצעדורן פאר חשוכי בנים, ביז $120,000 פער פארפאלק.*

די יעצטיגע בשורה טובה קומט נאכדעם וואס די טראמפ אדמיניסטראציע האט פאר עטליכע חדשים צוריק אנגעהויבן איינפירן פרישע טוישונגען צו פארגרינגערן די אסטראנאמישע קאסטן פאר פארפעלקער וועלכע ווארטן געהאלפן צו ווערן, מיט׳ן דראסטיש רעדוצירן די קאסטן פון געוויסע מעדיצינען, ביז 83% אראפ פון די אריגינעלע קאסטן.

דעם היינטיגן מאנטאג איז געבראכן געווארן די היסטארישע פרישע נייעס דורך פרעזידענט טראמפ, ווען ער האט אונטערגעשריבן דעם עקזעקיטיוון ארדער וואס טוט ערמעגליכן פאר פריוואטע אינשורענס פירמעס צו דעקן די קאסטן פון פראצעדורן פאר חשוכי בנים, ביז אזויפיל ווי גאנצע $120,000 פאר א פארפאלק. די יעצטיגע טויש טוט באדייטן אז אינשורענס פירמעס קענען דעקן די קאסטן אויך פאר די וועלכע ארבעטן אין ׳קליינע ביזנעסער׳, וועלכע ערהאלטן אינשורענס דורך די פירמעס, גענוי אזויווי דענטעל און וויזשען קאסטן.

די פרעזידענט האט זיך אויסגעדרוקט פאר די ענגע צאל פארזאמעלטע: דאס וואס די לעבער דעפארטמענט פירט היינט דורך פאר די פארפעלקער, איז א ׳ביג דיעל׳. 

אין די זעלבע צייט האט זיך אויסגעדרוקט סענעטאר בריט פון אלאבאמע: היינט איז געלייגט געווארן די גרונדשטיין אז יעדעס איינציגסטע פארפאלק זענען זיך קענען ערלויבן צו האבן קינדער.

די צדק ארגענעזאציע איז געווארן איינגעלאדענט צום ענגען ביים פרעסע קאנפרענץ אינעם ווייסן הויז דעם מאנטאג, און האט ספעציעל אראפגעשיקט א רעפרעזענטיוו - מרת ווייס, די טאכטער פון הרב שלום מרדכי רובאשקין - אפצוגעבן א דאנק פאר׳ן פרעזידענט און זיין אדמיניסטראציע אויף די אנגייענדע אקטיווע ארבעט צו ברענגען נענטער די פולקאמע בשורה טובה, און אין די זעלבע צייט ווערט אריינגעלייגט איבערמידליכע כוחות פאר די קומענדיגע שריט למען אחבנ״י.