שמחת הבר מצוה פון בן כ"ק אדמו"ר משקלאוו שליט"א.
גאלערי
שמחת הבר מצוה פון בן כ"ק אדמו"ר משקלאוו שליט"א.
חסידי שקלאוו און תושבי העיר טשעסטנאט רידש האבן מיט גרויס התרגשות מיטגעהאלטן א שיינע שמחת בית צדיקים, שמחת הבר מצוה פון הבה"ח פאר מקדושים כמר שמעון פסח נ"י, זון פון כ"ק הגה"צ המקובל רבי ישורון צייטלין שליט"א אדמו"ר משקלאוו, חתן המשפיע הנודע הגה"צ רבי אריה וואהל שליט"א רב ומו"ץ בעיה"ת רמת בית שמש אין ארץ ישראל ומחבר ספרי "נגלות האריז"ל".
שוין אויפ'ן דערהויבענעם שבת חיי שרה האט זיך אנגעזען די רוממ'דיגע אווירא דשמחה ביים מעמד העליה לתורה והקידוש. ביי תפילת שחרית איז בחור הבר מצוה צו געגאנגען צו חזרת הש"ץ און האט געדאווענט בקול ובנעימה נפלאה כזקן ורגיל, וואס האט מעורר געווען די לבבות פון אלע מתפללים.
דארך דעם קידוש האט אויפגעטרעטן דער זיידע הגה"צ רבי אריה וואהל שליט"א, ועלכער איז געקומען ספעציעל פון ארץ ישראל לכבוד די שמחה, און האט מקשר געווען בטוב טעם ודעת כדרכו בקודש די ענינים פון די וואכעדיגע סדרה און די הפטרה מיט די שמחת הבר מצוה.
מוצאי שבת קודש איז די שמחה אפגעראכטן געווארן צוזאמען מיט א סעודת מלווה דמלכה ברוב פאר והדר אין ביהמ"ד וישיבת המקובלים "כתר שם טוב" דחסידי שקלאוו, וואס איז געווען צוגעשטעלט אויף א שיינעם פארנעם פאר'ן גאנצן עולם וואס זענען געקומען מיטהאלטן די געהויבענע שמחה.
ארום אכט דרייסיג אווענט האט מען עמפאנגען דעם אדמו"ר שליט"א בשירה וזמרה. דער פאטער דער רבי שליט"א מיט דעם זיידן הגה"צ רבי אריה וואהל שליט"א, האבן זיך געוואשן צו דער סעודת מצוה אינאיינעם מיט עטליכע אדמורי"ם, רבנים וראשי ישיבות וועלכע האבן באשיינט דעם אויבן-אן. און די חברים פון בחור הבר מצוה האבן געזונגען בנעימה ווארעמע ניגוני שמחה, מיט זמירות פון מלוה מלכה.
ביים סעודת מצוה האט אויפגעטרעטן דער אבי הבר מצוה כ"ק אדמו"ר משקלאוו שליט"א מיט פאסיגע דברי תורה, דערנאך האט דער בר מצוה בחור געזאגט דעם פשעטל הויך און קלאר מיט א געשמאק און ממשיך געווען מיט זיינע דברי תורה אפילו ווען דער ציבור האט אנגעהויבן אריינזינגען כנהוג. נאך די קונצליכער פשעטל האט זיך דער גאנצער ציבור אויפגעשטעלט אויף א פייערליכן ריקוד.
במהלך די שמחה האט מען זיך איינגעהערט צו די דברות קודש פונעם אורח הדגול הגה"צ אב"ד לב חזקי' שליט"א טשעסטנאט רידש, וועלכער האט באטאנט אין זיינע דברים אז זייט דעם עפנונג פון ביהמ"ד וישיבת המקובלים דחסידי שקלאוו האט אויפגעשיינט א נייער אור וואס שטראלט אויף פארן גאנצן געגנט תחת הנהגת כ"ק אדמו"ר שליט"א.
מיט גרויס אויפמערקזאמקייט האט זיך דער ציבור איינגעהערט צו דברי אלקים חיים פונעם רבי'ן'ס רבי הגה"ק מסקאליע שליט"א, וועלכער האט מאריך געווען איבער די גרויסע מעלות פונעם אבי חתן הבר מצוה שליט"א, זיינע מופלא'דיגע שיעורים אין קבלה און די עבודת הקירוב וואס ער טוט מיט בחורי ישראל, ווי אויך די מעלות פון דער חתן הבר מצוה עדיו לגאון ולתפארת, אינאיינעם מיט אנטפלעקן בטוב טעם ודעת די קשרים צו מצות קריאת שמע, וואס איז די ערשטע מצוה וואס א בר מצוה בחור איז מקיים ביים אריינגיין אין עול תורה ומצוות.
נאך האט אויפגעטרעטן כ"ק אדמו"ר משענדישוב שליט"א וועלעכער האט דערציילט זכרונות און אנעקדאטן פון די עבודת ה' פון ידיד נפשו זצ"ל דער טאטע פון אדמו"ר שליט"א, וועלכער דער בר מצוה בחור איז נקרא על שמו.
אין לויף פון זיינע טרעפליכע רייד לכבוד דער שמחה, האט דער זיידע הגר"א וואהל שליט"א מעורר געווען דעם ציבור מיט די רייד פונעם הייליגן חיד"א אין ספה"ק "חומת אנך", אז בזכות מצות תפילין נגאלו אבותינו ממצרים קודם הזמן און ארויס פון עבדות לחרות. בעת רצון זו האט ער געבעטן פונעם גאנצן ציבור מיט גרויס רגש און דמעות שליש צו זאגן בצוותא די תפילה הנוראה פונעם ספר "מעבר יבק", וואס איז נהוג כהיום אין א סאך קהילות צו זאגען בציבור יעדער ר"ח אדער מוצאי שבת מברכין, צו בעטן אויף די גאולה השלימה, גילוי מלכות ה' בעולם, חידוש מלכות בית דוד און בנין בית המקדש בב"א. דער זיידע שליט"א האט עובר געווען לפני התיבה און דער גאנצער ציבור האט מיטגעדאווענט די תפילה בחרדת קודש מיט גרויס התעוררות.
נאך די געהויבענע תפילה און די דברות קודש האט זיך דער גאנצער ציבור ווידער אמאל ארויסגעלאזט אין א מעכטיגן און דערהויבענעם ריקוד "בנה ביתך כבתחילה", און דער בר מצוה בחור נ"י איז מכובד געווארן מיט ברכת המזון על הכוס. צום שלוס איז דער גאנצער עולם אריבער ווינטשן לחיים און מזל טוב פאר די בעלי שמחה. און באלד דערנאך האט דער ציבור אוועקגערוקט די טישן און האט זיך ארויסגעלאזט אין באגיסטערטע ריקודים אין קאראהאדן מיט דעם חתן השמחה, ווען די זיידע און דער פאטער שליט"א זענען אראפ פון די בלעמעהר פון אויבן-נון און האבן זיך צוגעשלאסן צו די ריקודים בחדוות קודש.
נאך האבן באשיינט די שמחה, כ"ק אדמו"ר מסקווירא מאנסי שליט"א, כ"ק אדמו"ר מראדזין שליט"א, כ"ק האדמו"ר מחענטשין שליט"א, הגה"צ אבד"ק מעליץ-מאנסי שליט"א, הגאון ר' משה בארון שליט"א ר"מ ישיבת בית התלמוד, הגה"צ אב"ד "אור שלמה" מאנסי, הגר"ש הערבסט אב"ד פרימישלאן שליט"א, הגה"צ ר' אליעזר חיים גאלדשטיין אבד"ק "תהילה לדוד" מאנסי, הגר"ד ביטון אב"ד מילל בעסאהן שליט"א, און כ"ק אדמו"ר מסקאהל שליט"א.
דער מעמד תפילין לייגען איז פארגעקומען ביי מרן אדמו"ר הגה"ק מסקאליע שליט"א בבית מדרשו "תולדות יצחק" סקאליע אין בארא פארק, און דערנאך איז פארגעקומען א רוממ'דיגע שלחן לחיים לכבוד המאורע.