וואשינגטאן. — עסקנים און פרעסע פארשטייער זענען געזען געווארן דאנערשטאג אינדרויסן פון די טויערן פונעם ווייסן הויז, בעת מ'האט געמאכט די לעצטע צוגרייטונגען אפצוווארטן א גרויסארטיגע דעלעגאציע פון אדמו"רים און ראשי ישיבות.

צווישן די אנוועזנדע אינדרויסן פונעם 'וועסט ווינג' האט מען געזען דעם באקאנטן עסקן הרב משה מארגארעטן, יו"ר פון די 'צדק' ארגאניזאציע, אינאיינעם מיט דעם רעדאקטאר פון 'משפחה' מאגאזין אריה ארליך און דער ווייסע הויז קארעספאנדענט דזשעיק טערקס. די עסקנים און מידיא לייט האבן זיך פארזאמלט אויף פענסילוועניע עוועניו צו העלפן קאארדינירן די אריינגאנג פראטאקאלן און ארויסהעלפן מיט די אויפנאמע פון די חשוב'ע דעלעגאציע פון גדולי ישראל בעפאר זייער וויכטיגע מיטינג אינעם 'אוועל אפיס'.

די היסטארישע דעלעגאציע נעמט אריין כ"ק אדמו"ר מוויזשניץ מאנסי שליט"א, די סאטמארע פירערשאפט, כ"ק אדמו"ר מבאבוב שליט"א, הרה"צ ר' אהרן מענדל טווערסקי שליט"א אלס פארטרעטער פון כ"ק אדמו"ר מסקווירא שליט"א, און הגאון ר' מלכיאל קאטלער שליט"א ראש ישיבת לעיקוואוד.

די גדולי ישראל זענען זיך צוזאמגעקומען אין די הויפטשטאט צו אדרעסירן וויכטיגע אידישע אנגעלעגנהייטן און געברויכן פאר די קאמיוניטי יעצט אין די טעג בעפאר ראש השנה.