א גרויסע התרגשות האט געהערשט נעכטן ביי חסידי און אוהדי נדבורנה אין שטאט בית שמש, ווען כ"ק אדמו"ר מנדבורנה שליט"א איז געקומען צו פארן ספעציעל קיין בית שמש, אינעם נייעם בית מדרש פון די קהילה אין רמה ד' 4, צו אויפנעמען דעם ציבור און מחזק זיין די ארטיגע קהילה וועלכע וואקסט און בליהט בליעה"ר אין די לעצטע יארן.

צום ערשט האט דער רבי שליט"א געדאווענט מעריב אינאיינעם מיטן ציבור.

נאכן דאווענען זענען די חסידים און ארטיגע תושבים אריין אל הקודש פנימה, א לענגערע צייט, מזכיר צו זיין לעצה ולברכה לקראת די דערנענטערנדיגע ימי הרחמים והרצון.

מיט גרויס התרגשות האבן די חסידים שלום גענומען און באקומען מידי קדשו א קריגל האניג פאר א גוט און זיס יאר.

דורכאויס דעם אוונט האבן די עסקנים פון 'קרן הבנין' פרעזענטירט פארן רבי'ן די פרישע בוי פלענער פונעם קומענדיגן צענטער.

דער רבי שליט"א האט זיך שטארק אינטערעסירט איבער דעם פארשריט פונעם בוי פראיעקט, און בפרט איבער די הערליכע אנטוויקלונג פון די קהילה, נאכדעם וואס אין דעם פארגאנגענעם יאר האבן זיך אריבערגעצויגן פילע פרישע אברכים זיך צו באזעצן אין דעם געגנט, א סטאטוס וואס האט מיטגעברענגט נייע חסד ארגאניזאציעס, מנינים און שיעורי תורה.

ביים אויפנאמע האבן זיך אויך אנגעזען עטליכע חשוב'ע רבנים וועלכע זענען אריין אל הקודש פנימה זיך צו וואונטשן בברכת השנים. צווישן זיי זענען געווען:

הגרי"מ שפירא שליט"א, רב ואב"ד רמה ד' 4

הגרח"י רובינשטיין שליט"א, רב ואב"ד רמה ד' 2

הגר"ש געשטעטנער שליט"א, מראשי רבני רמה ד' 4

אזוי אויך זענען אריין בקודש פנימה די ארטיגע עסקנים:

דער מעיאר ר' שמואל גרינבערג הי"ו, און דער וויצע מעיאר ר' שמעון גאלדבערג הי"ו.

דער רבי שליט"א האט זיי אויפגענומען מיט גרויס ווארימקייט, זיך באדאנקט פאר זייער הילף לטובת די מוסדות הקדושים, און זיי אנגעוואונטשן א שנת ברכה והצלחה צוזאמען מיט א קריגל האניג לכבוד די ימים קדושים.