הגה"צ אבדק"ק ור"מ שליט"א ביי תפילת מנחה און דערנאך ביים מסיבת לחיים בהיכל הישיבה קטנה אין אנטווערפן.

ארום 7:00 נאכמיטאג איז דער רב אנגעקומען בהיכל הישיבה קטנה דמוסדותינו הק' בהנהלת הר"ר ישראל קליין שליט"א,

צום ערשט האט דער רב געדאווענט תפילת מנחה אינאיינעם מיט די תלמידי הישיבה.

נאכ'ן דאווענען איז פארגעקומען א מסיבת לחיים ומעמד קבלת פנים, מ'האט מקבל פנים געווען דעם רב מיט ניגוני שמחה,

דער רב האט געמאכט א לחיים און אנגעוואונטשן פאר'ן מנהל הישיבה און פאר די רמ"י ותלמידי הישיבה, און באזונדער פאר ר' יושע גרינפעלד הי"ו וואס איז עוסק בצרכי מצוה צו שאפן געלט להחזקת הישיבה.

דערנאך האט דער רב משמיע געווען א דרשה בדברי חיזוק והדרכה, מוסר והתעוררות,

צום ערשט האט דער רב ארומגערעדט בשבח פון די ישיבה וואס איז אזוי הערליך שיין אוועקגעשטעלט, יעדעס מאל מ'קומט דא ווערט מען עקסטער נתפעל וויאזוי ס'שטייגט בכמות ובאיכות, כסדר הערט מען צוריק גאר גוטע גריסן, ובפרט יעצט וואס די בחורים האבן אריינגעלייגט מורא'דיגע כוחות מ'האט געלערנט שעות רצופות בימי השובבי"ם,

און מאריך געווען בשבח פון די מרביצי תורה וועלכע לייגן אריין שטארקע כוחות, און אזוי אויך דער חשוב'ער דיין דקהילתינו הק' וואס געט זיך איבער בלב ונפש פאר יעדע דבר שבקדושה אין די קהילה ובפרט פון די ישיבה.

דער רב האט ארומגערעדט בשבח פונעם פראגראם בין כותלי הישיבה ווי בחורים טוען דורך הלכה'דיגע שאלות בפלפול חברים, און דערביי איבערגעלאזט דריי שאלות פאר די בחורים בענינים הנוגעים למעשה, און געבעטן אז מ'זאל עס אדורכטוהן און מ'וועט הנאה האבן צוריקצוהערן די תשובות דערצו,

א - היי יאר וואס פורים געפאלט פרייטאג, צו איז א לכתחילה מקבל שבת צו זיין פרי בעוד היום גדול, און נאכדעם מאכן די סעודה יוצא צו זיין מיט דעם סעודת פורים און סעודת שבת?

ב - אויב איינער האט אזוי געטוהן וואס טוט מען ביים בענטשן, מ'זאגט על הנסים אדער רצה? און וואס איז די דין ווען ס'איז ראש חודש פרייטאג, זאגט מען יעלה ויבוא אדער רצה?

ג - אויב איינער דארף מאכן א ברית פרייטאג, און דער מוהל האט מקבל שבת געווען פרי, דארף מען זוכן א צווייטן מוהל? און אויב ס'איז נישט דא מעג ער מאכן די ברית?

דער רב האט ארומגערעדט איבער די גרויסקייט פון יום טוב פורים ארויסברענגענדיג ווי אלע ימים טובים זענען מרומז דערין, און מען דארף וויסן וויאזוי זיך צוצוגרייטן צו אזא געהויבענע טאג.

דער רב האט ארויסגעברענגט פילע נקודות וואס זענען נוגע מדי יום ביומו פאר בחורים און אויפגעפאדערט צו שטיין דערויף וואס דורכדעם וועט מען קענען אנקומען און אויסשטייגן,

דער רב האט ארומגערעדט איבער די וויכטיקייט פון גיין אין מקוה פאר'ן דאווענען, לערנען פאר'ן דאווענען, עוסק זיין בתורה זיצנדיג אויף איין פלאץ און זיך מייגע זיין אויף תורה, די תכלית פון בחור'ישע יארן איז זיך אנצופילן מיט תורה, ארויסהעלפן חברים אין תורה, דער רמב"ם זאגט אז די גרעסטע גמילות חסדים איז בעניני רוחניות,

ווען א בחור טראכט כ'גיי מיר נעמען און נאכדעם פאלט ער נאכאמאל אדורך, זאל ער נישט ווערן צוקלאפט, דאס איז א מענטש, מ'האט כסדר עליות און ירידות, מ'קען זיך אייביג אויפהייבן, מ'דארף זעהן נישט צו פאלן צו שטארק און זיך אויפהייבן, אבער צום סוף וועט מען בייקומען דעם יצר הרע,

מ'דארף זיך זעהן צו האלטן צוזאמען בכח האחדות, און זיך גאר שטארק אפהיטן פון די שלעכטע מידה פון גאוה וואס איז דוחה רגלי השכינה,

לערנען חסיד'ישע ספרים ובפרט פאר די ימים טובים, קדושת לוי, בני יששכר, ייטב פנים, וכדו', ס'איז א געוואלדיגע יסוד אין א בחור, דורכדעם קען מען אריינברענגן אין זיך א חיות דקדושה און שפירן א טעם אין א מצוה,

דער רב האט אויסגעפירט אז מ'וועט אי"ה איבערגעבן א גריס פאר'ן טאטן זז"ג וואס האט זייער הנאה פון די קהילה, און צוגעענדיגט מיט ברכות לרוב מ'זאל אויסוואקסן ריכטיגע בני תורה, לומדי תורה, יראתם קודמת לחכמתם, ביז דער טאטע זז"ג וועט אונז פירן קעגן משיח צדקינו בב"א.

נאכ'ן דרשה האט דער רב פארטיילט די תעודות פאר די תלמידי הישיבה וואס האבן אריינגעלייגט שווערע כוחות צו לערנען שעות ברצופות במשך די ימי השובבי"ם.

דערנאך איז דער רב אראפ אינעם אונטערשטן שטאק פונעם בנין הביהמ"ד וואו ס'איז אין די לעצטערע חדשים אהערגעשטעלט געווארן א שפאגל נייע קאך דורך די הנהלת הקהילה וואס וועט דינען פאר די באנוץ פון די ישיבה קטנה און אויף צו ערמעגליכן פאר אנשי שלומינו צו קענען מאכן ביליגערע שמחות,

דער רב איז ארומגעגאנגען אין באגלייטונג פון די הנהלת הקהילה און זיך אומגעקוקט אויפ'ן פלאץ, עס האט זיך פארמירט א שיינע שמועס איבער דעם פראיעקט צוצושטעלן ביליגע שמחות, און דער רב האט ווארעם אנגעוואונטשן פאר די עוסקים במלאכת הקודש,