ברוך דיין האמת: א שווערע וואלקן פון טרויער האט ארומגענומען די גאנצע חסידישע וועלט, הערנדיג די ביטערע בשורה פון ניו יארק איבער די הסתלקות לשמי מרום פון כ"ק אדמו"ר מביאלא אוסטרובא זצ"ל, פון די גבעת שאול געגנט אין ירושלים. דער רבי איז נסתלק געווארן אין עלטער פון 61 יאר, נאכדעם וואס ער איז פלוצלינג אריבער א שווערע מעדיצינישע פראצעדור און איז געווען שפיטאליזירט אין א קריטישן מצב אין א שפיטאל אין מאנהעטן.


דער רבי האט זיך געפינען אין אמעריקע אויף א באזוך לטובות מוסדותיו און מחזיר זיין אידן בתשובה ווי זיין שטייגער, ווען זיין געזונט צושטאנד האט זיך פלוצלינג פארערגערט אויף א גאר שווערן אופן. פילע אידן האבן מתפלל געווען און איינגעריסן הימלען פאר די רפואה פון רבי אברהם ירחמיאל בן שרה רבקה, אבער ליידער נצחו אראלים את המצוקים ונשמתו הטהורה עלתה בסערה השמימה, ווען ארום זיין בעט געפינען זיך די נאנטע מקורבים בני המשפחה און חסידים.

דער מיטה פונעם רבי'ן זצ"ל וועט אפגעפירט ווערן פון אמעריקע קיין ארץ הקודש. די לוי' וועט זיך ארויסלאזן פון זיין בית המדרש אויף רחוב פנחס קהתי אין די גבעת שאול געגנט אין ירושלים, אויפן וועג צום הר הזיתים, וואו ער וועט קומען לקבורה אין די חלקה פון זיינע הייליגע אבות. צווישן זיינע ברידער וועלכע פירן אן מיט די הייליגע ביאלא קהילות זענען כ"ק אדמו"ר מביאלא בני ברק, כ"ק אדמו"ר מביאלא בית שמש, כ"ק אדמו"ר מביאלא בארא פארק, און זיין שוואגער כ"ק אדמו"ר משידלאווצא
וכל בית ישראל יבכו את השריפה אשר שרף ה' - תהא נשמתו צרורה בצרור החיים.

גדולה מיתת צדיקים כשריפת בית אלקינו: דער עולם החסידות האט היינט מאנטאג אינדערפרי מיט צער און טרויער אויפגענומען די בשורה קשה פון אמעריקע איבער די הסתלקות לשמי מרום פון כ"ק אדמו"ר מביאלא אוסטרובא זצ"ל, ווי באריכטעט, פון די געהויבענע פרעזענליכקייטן אין די גבעת שאול געגנט אין ירושלים, מיט זיין הסתלקות איז אוועקגעריסן געווארן אן עובד ה', חסידא ופרישא, ענוותן כהלל, גריס באורייתא תדירה ולא מחזיק טיבותא לנפשיה.

דער רבי זצ"ל איז געבוירן געווארן ה' סיון שנת תשכ"ה צו זיין פאטער כ"ק אדמו"ר בעל 'להבת דוד' מביאלא בני ברק זצ"ל, און צו זיין מוטער די צדקנית הרבנית מרת שרה רבקה ע"ה. שוין פון זיין יוגנט אן האט ער איינגעזאפט תורה, חסידות און ריינע יראת שמים פון זיינע הייליגע אבות הק', די צדיקים לבית ביאלא, פשיסחא און אוסטרובא, און ער האט שטארק אויסגעשטיגן אין לימוד התורה און חסידות.

כשהגיע לפרקו האט ער חתונה געהאט מיט זיין רעבעצין תחי', די טאכטער פון כ"ק אדמו"ר רבי אברהם שלמה בידערמאן מלעלוב זצ"ל. נאך זיין חתונה האט ער קודם געוואוינט אויף רחוב רבינו גרשום און שפעטער האט ער זיך אריבערגעצויגן אין די גבעת שאול געגנט אין ירושלים, וואו ער האט אויפגעשטעלט זיין בארימטן בית המדרש "ביאלא אוסטרובא" אויף רחוב פנחס קהתי.

דער רבי זצ"ל האט מפיץ געווען תורה און יראת שמים מיט א געוואלדיגע ווארימקייט, און האט מקרב געווען פילע פארלאזענע נשמות צום טאטן אין הימל. ער האט אנגעפירט זיין עדה מיט א מורא'דיגע דביקות און פלאמדיגע עבודת השם, און האט אויסגעבויט תורה צענטערן און די "להבת דוד" בתי מדרשים אין פארשידענע קהילות איבער אמעריקא, ווי למשל אין מאנהעטן, לאס אנדזשעלעס, און מיאמי.

דער רבי זצ"ל איז געווען א ריזן געשטאלט, אן אמת'ע עובד השם מיט א געוואלדיגע מסירות נפש. זיין לעבן איז געווען באגלייט מיט שרעקליכע יסורים און הארץ רייסענדיגע טראגעדיעס וואס מ'האט כמעט נישט געזען ביי קיין שום מענטש, אבער ער האט אלעס מקבל געווען מיט אן אומשאצבארע אמונה, מיט ליבשאפט, און מיט א הייליגע שטילקייט. במשך זיין לעבן האט ער פארלוירן זיין אשת נעורים ע"ה, וואס איז נפטר געווארן פון די ביטערע שווערע מחלה ה"י. ער האט אויך ליידער באגראבן צוויי פון זיין קינדער ה"י אין זייערע שענסטע יארן וועלכע זענען פריצייטיג אוועקגעריסן געווארן רח"ל: בערך צען יאר צוריק איז זיין טאכטער מרת חנה פעשא פרענקל ע"ה אומגעקומען אין די שוידערליכע עקסידענט פון די 402 באס; שפעטער האט ער פארלוירן נאך א טאכטער וואס איז אוועק אינגערהייט; און פאר בלויז בערך א האלב יאר צוריק האט אים באטראפן נאך א שווערע קלאפ ווען זיין עלטסטע זון, הגה"צ רבי משה מרדכי ראבינאוויטש זצ"ל, איז פלוצלינג נפטר געווען ביי די 36 יאר ה"י.

טראץ די אלע שווערע בשורות איוב, די צרות, און די מורא'דיגע יסורים וואס האבן אים ארומגענומען פון אלע זייטן, האט דער רבי זצ"ל ווייטער אנגעפירט זיין קהילה מיט א געהויבענקייט, אויפגעראכטן צובראכענע הערצער, און ארויסגעוויזן אן אויסערגעווענליכע עניוות און דביקות אינעם באשעפער. אין די לעצטערע תקופה איז ער געווען זייער שוואך אבער דאך האט ער פארגעזעצט זיין עבודת הקודש מיט מסירת נפש. חסידים דערציילן אז יעדע דאללער וואס די רבי האט נאר געהאט, האט ער פארטיילט שטילערהייט פאר צדקה פאר די נויטבאדערפיגע יודן אין שטאט, זאגענדיג אז ס'זאל זיין לע"נ זיינע ליבע קינדערלעך ז"ל.

מיט בלויז עטליכע וואכן צוריק, בשעת די רבי זצ"ל האט זיך געפונען אויף א באזוך דא אין אמעריקע, איז דער רבי זצ"ל אריינגעפירט געווארן אין א שפיטאל אין מאנהעטן אין א קריטישן מצב. חסידים ואנשי מעשה אין ארץ ישראל און איבער די גאנצע וועלט האבן איינגעריסן וועלטן פארן רפואה, אבער ליידער איז דער גזר דין שוין געווען פארחתמ'ט, און ער האט צוריקגעגעבן זיין ריינע נשמה פארן באשעפער.

מיט'ן הסתלקות פונעם ביאלער רבי'ן זצ"ל איז אוועקגעריסן געווארן אן עמודא דנהורא וואס האט באלאכטן און משפיע געווען פאר פילע אידן וואס האבן זיך אנגעשעפט פון דעם באר מים חיים תורה ועבודה, ורבים נהנו ממנו עצה ותושי', ועתה חסרנו כל אלה. דער רבי איז געווען אן אדרעס פאר פילע אידן וואס זענען געקומען זיך דורכרעדן און נהנה זיין עצה ותושי', און ספעציעל פאר פארלאזענע נשמות ל"ע וועלכע זענען פארקראכן פון ריכטיגן וועג, פארמאגנדיג א ספעציעלע שפראך פאר צעירי הצאן משפיע צו זיין פאר יעדן כפי דרגתו תורה ויראת שמים און מדות טובות, ואת הדרך אשר נלך בה