גרויסע צוגרייטונגען קומען פאר אין חצר הקודש וויזשניץ לקראת חודש החגים הבעל"ט, מיט די פארענדיגונג פון א מאסיווע פארברייטערטע צייטווייליגן בית מדרש הגדול, וואס דינט די טויזנטער חסידי וויזשניץ ביז די פראיעקט פונעם גרויסן "מרכז העולמי" וואס ווערט יעצט געבויט וועט ווערן פולשטענדיג פארענדיגט.

אין די לעצטע יארן דינט דער צייטווייליגער ביהמ"ד הגדול אלס דער צענטראלער פלאץ פאר די תפילות, טישן און מעמדי הקודש אינעם הויף. אבער דאס פלאץ איז געווארן צו ענג צו קענען ארייננעמען דעם ריזיגן ציבור, און בפרט אין חודש תשרי, ווען הונדערטער אורחים פון אומעטום און פון חוץ לארץ קומען זיך מסתופף זיין בצלו פון כ"ק מרן אדמו"ר הקוה"ט שליט"א, איז דאס פלאץ צר מלהכיל.

לקראת חגי תשרי האט מען דערפאר באשלאסן צו מאכן א פרישע היסטארישע הרחבה צום קאמפלעקס. די נייע פליגל וועט צוגעבן נאך איבער א טויזנט נייע זיצן און וועט ערמעגליכן אפצורעכטן די תפילות הימים הנוראים, חג הסוכות און שמחת תורה מיט א ברייטקייט, ווי אויך אלע אנדערע אירועים און מעמדים אינעם הויף.

די הרחבה איז אויך געפלאנט געווארן מיט א בליק אויף פאראויס פאר די קומענדיגע חדשים און די גרויסע שמחות וואס זענען ערווארטעט בחצר הקודש. איבערהויפט גרייט מען זיך צו די גרויסע 'שמחת בית וויזשניץ - פרעמישלאן' וואס קומט פאר קומענדיגן חודש כסלו, וואו עס ווערן ערווארטעט טויזנטער חסידים און אורחים פון ארץ ישראל און פון איבער דער גארער וועלט.

פארגאנגענעם ערב שבת האט כ"ק אדמו"ר מוויזניץ שליט"א קובע געווען א מזוזה ביים אריינגאנג פון די נייע מקום, לקראת די פתיחה און באניץ פון די נייע טייל פאר די ימי החגים הבעל"ט.