תפיסה רבנים בעטן דעם סאטמארער רבי'ן צו רעדן מיט פרעזידענט טראמפ אין ווייסן הויז איבערן מצב פון אידישע ארעסטאנטן
גאלערי
היסטארישע באזוך אין ווייסן הויז: עסקנים און רבנים למען האסירים אין וויכטיגע באראטונגען בבית כ"ק אדמו"ר מסאטמאר שליט"א (מהרז"ל)
א דעלעגאציע פון רבנים און עסקנים וועלכע געבן זיך אפ מיט אידישע ארעסטאנטן אין די פעדעראלע טורמעס, האבן זיך געטראפן מיט כ"ק אדמו"ר מסאטמאר שליט"א (מהרז"ל) אין זיין רעזידענץ אין וויליאמסבורג, אין צוגרייטונג צו דעם ערווארטעטן באזוך פונעם רבי'ן מיטן פרעזידענט דאנאלד טראמפ אין ווייסן הויז דעם קומענדיגן דאנערשטאג.
די עסקנים האבן געבעטן פונעם רבי'ן אויסצונוצן די זעלטענע געלעגנהייט ארויפצוברענגען די ווייטאגליכע אישו פון אידישע פריזאנערס דירעקט צום פרעזידענט. מען האט ארומגערעדט איבער די שוועריגקייטן פון ארעסטאנטן וואס זיצן לאנגע יארן, און די רעליגיעזע און פאמיליע טשעלענדזשעס וואס קומען מיט דעם. די רבנים האבן ארויסגעברענגט עטליכע וויכטיגע פונקטן וואס זיי האפן דער פרעזידענט וועט קענען העלפן, אריינגערעכנט די קאנדישאנס אין די טורמעס, וויזיטעישאן פאליסיס, און צו מאכן גרינגער פאר ארעסטאנטן צו באקומען א 'פוירלאוי' (צייטווייליגע אורלויב) זיך צו קענען באטייליגן ביי וויכטיגע פאמיליע שמחות.
ביי די אסיפה איז אויך אנוועזנד געווען דעם רבי'נס זון, הגה"צ ר' יעקב בער טייטלבוים אבד"ק סיגעט שליט"א, וועלכער איז שטארק אריינגעטון אין עסקנות למען האסירים, ווי אויך די הויפט סאטמארע עסקנים, הרב משה דוד נידערמאן און הרב אברהם יהושע פרינד.
די זיצונג קומט אין די צייט וואס די צוגרייטונגען זענען אין פולן שוואונג לקראת די היסטארישע נסיעה קיין וואשינגטאן דאנערשטאג, וואו א רייע גדולי ישראל און אדמו"רים וועלן זיך טרעפן מיטן פרעזידענט. די דעלעגאציע נעמט אריין כ"ק אדמו"ר מסאטמאר שליט"א (מהרז"ל), כ"ק אדמו"ר מסאטמאר שליט"א (מהר"א), כ"ק אדמו"ר מבאבוב שליט"א, כ"ק אדמו"ר מוויזשניץ מאנסי שליט"א, און הגאון ר' מלכיאל קאטלער שליט"א ראש ישיבת לעיקוואד. כ"ק אדמו"ר מסקווירא שליט"א וועט רעפרעזענטירט ווערן דורך זיין עלטסטן זון הגה"צ ר' אהרן מענדל טווערסקי שליט"א.
לויט די באריכטן, זענען די מיטינגס אינעם 'אוועל אפיס' געסקעדזשולד אויף דאנערשטאג נאכמיטאג. דער פלאן איז אז יעדער פון די גדולי ישראל זאל האבן פריוואטע צייט מיטן פרעזידענט, אבער עס ווערט אויך באטראכט די מעגליכקייט פון א געמיינזאמע מיטינג וואו אלע רבנים וועלן זיצן אינאיינעם.
אין די זעלבע צייט קומען פאר העפטיגע צוגרייטונגען און באראטונגען צווישן הויפט עסקנים בבית כ"ק אדמו"ר מסאטמאר שליט"א (מהר"א) אין קרית יואל לקראת דעם וויכטיגן באזוך.
דער באזוך אין ווייסן הויז איז ערווארטעט ארויפצוברענגען פארשידענע וויכטיגע אישוס וואס זענען נוגע דעם היימישן חרדי'שן ציבור דירעקט צום פרעזידענט. פאר די עסקנים און רבנים למען האסירים, איז דאס א גאלדענע געלעגנהייט צו פארזיכערן אז די געברויכן און רעכטן פון די אידישע ארעסטאנטן ווערן נישט פארגעסן און ווערן געהעריג אדרעסירט ביי די העכסטע פענסטער.